आंधळगाव, ता.१० : शिरूर तालुक्याच्या पूर्व भागातील नागरगावसह परिसरात युरियाचा साठा उपलब्ध असतानाही कृषी सेवा केंद्र चालकांकडून कृत्रिम टंचाई निर्माण केली जात आहे. ‘नियमित ग्राहकांना सोडून तुम्हाला युरिया देता येणार नाही,’ असे चालक सांगत असून, अडवणूक केली जात असल्याने शेतकरी हवालदिल झाले आहेत.

युरिया घ्यायचा असेल तर अन्य खते व औषधे घेण्याचा तगादा कृषी सेवा केंद्र चालकांकडून लावला जात असल्याने शेतकरी हवालदिल झाला आहे.त्यामुळे दौंड तालुक्यात जाऊन शेतकऱ्यांना युरिया आणण्याची वेळ येत असून त्यांना मोठा मनस्ताप सहन करावा लागत आहे. कृषी विभागाने अशा संबंधित कृषी केंद्रावर त्वरित कठोर कारवाई करावी, अशी मागणी शेतकऱ्यांकडून केली जात आहे.

शिरूर तालुक्याच्या पूर्व भागात यंदा समाधानकारक पाऊस झाल्यामुळे खरिपाच्या पेरण्या सुरू झाल्या आहेत. अनेक ठिकाणी पिके उगवून आली आहेत. यावेळी आवश्यकता असताना ऐन खरिपात कृषी केंद्र सेवा चालकांकडून युरियाची कृत्रिम टंचाई निर्माण केली जात आहे. यामुळे गावोगाव फिरत युरिया देता का युरिया असे म्हणण्याची वेळ शेतकऱ्यांवर आली आहे.
खरिपाच्या बाजरी, ऊस, मूग अशा पिकांसाठी नत्रयुक्त युरियाची अत्यंत आवश्यकता असते. वेळेत युरिया उपलब्ध करू न दिल्याने त्याचा उत्पादनावर मोठा परिणाम होत आहे.

शेतकऱ्यांना शासनाने मुबलक प्रमाणात युरिया खते उपलब्ध करून दिलेले असतानाही काही कृषी सेवा केंद्र चालक युरियाची कृत्रिम टंचाई भासवून अन्य खते खरेदी करण्याची शेतकऱ्यांना सक्ती करत असलेल्या कृषी सेवा केंद्र चालकांवर कृषी विभागाने त्वरित कारवाई करावी.
- संपत फराटे, अध्यक्ष, अखिल ग्राहक पंचायत

शिरूर तालुक्याच्या पूर्व भागात काही कृषी सेवा केंद्र चालक युरियाची कृत्रिम टंचाई निर्माण करत आहे. अशा संबंधित कृषी सेवा केंद्रावर कृषी विभागाने त्वरित कारवाई करावी.
- विकास फराटे-शेतकरी,मांडवगण फराटा

शिरूर तालुक्यातील नागरगावसह पूर्व परिसरात काही कृषी सेवा केंद्र चालक युरियाची कृत्रिम टंचाई करत असल्याबाबत तक्रार प्राप्त झाली आहे.संबंधित कृषी सेवा केंद्र चालकांना त्वरित नोटीस बजावून खुलासा मागवण्यात येईल. कोणीही साठेबाजी करून किंवा अधिक दराने विक्री करत असल्याचे आढळल्यास कृषी विभागाच्या नियंत्रण कक्षास तक्रार करावी.तुमच्या तक्रारीची गंभीर दखल घेतली जाईल.
- दिनेश अडसूळ, खत निरीक्षक तथा कृषी अधिकारी शिरूर पंचायत समिती

1601