मांडवगण फराटा, ता. १४ : मांडवगण फराटा (ता. शिरूर) येथे हॉटेलच्या परिसरात बेकायदा दारू विक्री करणाऱ्या दोघांवर कारवाई करत शिरूर पोलिस ठाण्यामध्ये शुक्रवारी (ता. १३) गुन्ह्याची नोंद करण्यात आली.
मांडवगण फराटा येथील हॉटेल राजमुद्रा व हॉटेल रानजत्रामध्ये देशी-विदेशी दारूची विनापरवाना विक्री करत असल्याची माहिती मांडवगण फराटा पोलिसांना मिळाली. यावर पोलिसांनी मारलेल्या छाप्यात हॉटेल राजमुद्राच्या पत्राशेडच्या आडोशाला खाकी रंगाच्या बॉक्समध्ये दोन हजार दोनशे रुपयाचे देशी दारूच्या २४ बाटल्या व विदेशी दारूच्या चार बाटल्या दारू आढळून आली. तर, दुसऱ्या घटनेत मांडवगण फराटा येथील हॉटेल रानजत्राच्या मागे पत्राशेडच्या आडोशाला मारलेल्या छाप्यात तीन हजार तीनशे साठ रुपयांचा मुद्देमाल पोलिसांना आढळला. यामध्ये देशी दारूच्या ४८ बाटल्या दारू मिळून आली. याप्रकरणी स्वप्नील दगडू भंडलकर व भाऊसाहेब बबन टोणगे यांच्याविरुद्ध पोलिसांनी गुन्हा दाखल केला आहे.