मांडवगण फराटा, ता. २५ : मांडवगण फराटा (ता. शिरूर) येथील घाडगेतळई ते बाभुळसरकडे जाणाऱ्या कालव्याच्या भरावावर महावितरण कंपनीने उच्च दाबाची वीज वाहिनी टाकून केलेले अतिक्रमण त्वरित हटविण्यात यावे, अशी मागणी येथील शेतकरी गणेश मोहन लगड यांनी लेखी पत्राद्वारे घोड पाटबंधारे खात्याचे कार्यकारी अभियंता यांच्याकडे केली आहे.
दिलेल्या पत्रात म्हटले की, मांडवगण फराटा हद्दीतून घाडगेतळई येथून बाभुळसर बुद्रुक बाजूला घोड पाटबंधारे खात्याच्या अखत्यारीत असलेला घोड कालवा गेला आहे. या कालव्याच्या भरावावरून येथील महावितरण मांडवगण फराटाचे तत्कालीन कनिष्ठ अभियंता यांनी घोड पाटबंधारे खात्याची कुठलीही शासकीय परवानगी न घेता विद्युत खांब उभारून उच्च दाबाची विद्युत वाहिनी नेत अतिक्रमण केले आहे. हा कालवा भराव टाकून नेला असल्याने अनेकवेळा पावसाळ्यात, तसेच कालव्याला पाणी आल्यानंतर भराव वाहून गेला आहे. या ठिकाणची माती भुसभुशीत असल्याने येथील विद्युत वाहिनी सध्या धोकादायक बनली आहे. मागील महिन्यात झालेल्या वादळी पावसात विद्युत खांब जमिनीवर कोसळले आहेत. ही विद्युत वाहिनी पूर्णपणे कालव्याच्या भरावावर असल्याने त्या कोसळल्यास धोका निर्माण होण्याची शक्यता नाकारता येत नाही. सध्या पावसाळ्याचे दिवस असल्याने व वेगाने येणाऱ्या वाऱ्यामुळे भरावावरील वीज वाहिनीचे खांब कालव्यात, तसेच बाजूच्या रस्त्यावर पडल्यास जीवितहानी व शेतमालाचे नुकसान होण्याची शक्यता आहे. तरी या प्रकरणाची सखोल चौकशी होऊन ही वीज वाहिनी काढून टाकण्याबाबत तत्काळ कार्यवाही करावी.