आंधळगाव, ता. १७ : दारू पिताना झालेल्या किरकोळ वादातून मित्राचा खून झाल्याची धक्कादायक घटना वडगाव रासाई (ता. शिरूर) येथे घडली. शनिवारी (ता. १६) रात्री सव्वाअकराच्या सुमारास हॉटेल सृष्टी बिअरबार समोर ही घटना घडली. अविनाश ऊर्फ विशाल जयवंत जावीर (वय ३०, रा. वडगाव रासाई), असे खून झालेल्याचे नाव आहे. याप्रकरणी त्याची पत्नी वंदना अविनाश जावीर (वय ३५) यांनी मांडवगण फराटा (ता. शिरूर) पोलिस दूरक्षेत्रात दिलेल्या फिर्यादीवरून आरोपी राहुल दत्ता गवांडे (रा. वडगाव रासाई) याला पोलिसांनी अटक केली.
पोलिसांनी दिलेल्या माहितीनुसार, अविनाश यांचा वेल्डिंग व्यवसाय असून, पत्नी मोलमजुरी करतात. अविनाश व विशाल उदमले हे मित्र असून, वेळोवेळी ते एकत्र दारू पिण्यासाठी जात होते. शनिवारी रात्री दहा वाजता अविनाश यांना विशाल हा त्यांच्या घरी येऊन घेऊन गेला. त्यानंतर हॉटेल सृष्टीजवळ अंबिका पानटपरी शेजारी अविनाश, विशाल उदमले आणि राहुल हे तिघेही दारू पीत होते. दरम्यान दारू पाजण्याच्या कारणावरून अविनाश व राहुल यांच्यात झालेल्या वादाचे पर्यावसन हाणामारीत झाले. यावेळी राहुल याने अविनाश याच्या चेहऱ्यावर बुक्के मारून त्याचे डोके दगडावर आपटले. त्यामुळे तो गंभीर जखमी झाला. त्याला वाचवण्यासाठी विशाल याने प्रयत्न केला व अजित शेलार याला मदतीस बोलावले. मात्र, तोपर्यंत अविनाश हा निपचित पडलेला होता. तातडीने त्याला वडगाव रासाई येथील खासगी रुग्णालयात नेण्यात आले, मात्र डॉक्टरांनी मृत घोषित केले.

आरोपी २४ तासांत ताब्यात
घटनेनंतर आरोपी राहुल गवांडे पसार झाला होता. घटनेची माहिती मिळताच उपविभागीय पोलिस अधिकारी प्रशांत ढोले, प्रभारी पोलिस निरीक्षक संतोष घोळवे यांनी घटनास्थळी भेट देऊन तपासाच्या सूचना दिल्या. पोलिस उपनिरीक्षक हणमंत नकाते यांनी तपासाची सूत्रे हाती घेऊन गोपनीय बातमीदारांच्या मदतीने अवघ्या चोवीस तासांत आरोपीला शोधून काढले. दरम्यान पोलिसांनी आरोपीला अटक केली. सोमवारी त्याला न्यायालयासमोर हजर करण्यात येणार असल्याची माहिती घटनेचा तपास करणारे पोलिस उपनिरीक्षक हणमंत नकाते यांनी दिली.