मांडवगण फराटा, ता. १९ : मांडवगण फराटा ते कानगाव दरम्यान असलेल्या महत्त्वाच्या कोल्हापुरी बंधाऱ्यासाठी १०५० नवीन लोखंडी ढापे उपलब्ध करून देण्यात आले आहेत. या ढाप्यांमुळे बंधाऱ्याची पाणी साठवण क्षमता वाढणार असून यामुळे परिसरातील शेतकऱ्यांना दिलासा मिळाला आहे. आमदार माऊली कटके यांनी या प्रश्नासाठी पालकमंत्री अजित पवार यांच्याकडे सातत्याने पाठपुरावा केल्याने अखेर हे ढापे उपलब्ध झाले आहेत.
मांडवगण फराटा येथील हा कोल्हापुरी पद्धतीचा बंधारा शिरूर तालुक्यातील मांडवगण फराटा, सादलगाव, दौंड तालुक्यातील हातवळण, कानगाव तसेच आजूबाजूच्या गावांसाठी सिंचनाच्या दृष्टीने अत्यंत महत्त्वाचा आहे. मात्र, गेल्या काही वर्षांपासून ढाप्यांची मोडतोड झाल्याने मोठ्या प्रमाणात गळती सुरू होती. पावसाळ्यात पाणी साठवण योग्यप्रकारे होत नसल्याने पाण्याचा अपव्यय होऊन याचा फटका रब्बी व उन्हाळी पिकांना बसत होता. त्यातच यंदा भीमा नदीला आलेल्या पुरामुळे अनेक ढापे वाहून गेले, तर काही ढाप्यांची मोठ्या प्रमाणात दुरवस्था झाली. या पार्श्वभूमीवर स्थानिक शेतकरी, ग्रामस्थांनी आमदार माऊली कटके यांच्याकडे बंधाऱ्यासाठी नवीन लोखंडी ढापे मिळावेत, अशी मागणी केली होती. आमदार कटके यांनी संबंधित पाटबंधारे विभागाकडे सातत्याने पाठपुरावा करून एक हजाराहून अधिक लोखंडी ढापे उपलब्ध करून दिले. यावेळी मांडवगणचे उपसरपंच अमोल शितोळे, सोसायटीचे माजी संचालक राजेंद्र दरेकर, संतोष फराटे इनामदार, वीरेंद्र शेलार, निलेश शितोळे, काळूराम उदमले, सागर फराटे आदी उपस्थित होते.

नवीन ढाप्यांचा शेतकऱ्यांना फायदा
पाटबंधारे खात्याने बंधाऱ्यावर ढापे बसविण्याचे काम हाती घेतले आहे. आठवड्याभरापासून बंधाऱ्यावर नवीन ढापे बसविण्याचे काम अंतिम टप्प्यात आले आहे. नवीन ढापे बसविल्यानंतर बंधाऱ्यातील गळती थांबणार असून पाण्याची साठवण क्षमता वाढणार आहे. याचा थेट फायदा शेती सिंचनाला होणार असून, विशेषतः ऊस, भाजीपाला व इतर पाण्यावर अवलंबून पिकांसाठी हा साठा उपयुक्त ठरेल.