आळंदी, ता. १९ : कार्तिकी वारी सोहळ्यासाठी राज्यभरातून आळंदीत येणाऱ्या भाविकांना दर्शन मंडपात खिचडी प्रसाद, चहा, केळी आणि पिण्याच्या पाण्याची सेवा मोफत दिली जाणार आहे. दरम्यान, भाविकांची सुरक्षितता जपण्यासाठी आणि मंदिर परिसरात चोऱ्‍या होऊ नये, यासाठी देवस्थानच्या व्यवस्थापनाने नव्वद सीसीटीव्ही कॅमेरे बसविले आहेत. याबाबत अधिक माहिती देताना आळंदी देवस्थानचे व्यवस्थापक ज्ञानेश्‍वर वीर यांनी सांगितले की, कार्तिकी वारी काळात लाखो भाविक संत ज्ञानेश्‍वरांच्या संजीवन समाधी दर्शनासाठी आळंदीत येतात. तासन् तास भाविकांना रांगेत उभे राहावे लागते. अशा वेळी इतर दर्शन मंडपाबाहेर जावे लागू नये यासाठी दर्शन मंडपातील भाविकांना मोफत खिचडी, चहा, पाणी, केळी दिली जाणार आहे. मंदिराच्या दक्षिण बाजूकडील आजोळ घराच्या जागेतील दर्शन मंडपामध्ये देवस्थानचे शिपाई तर इंद्रायणीकाठच्या दर्शन मंडपामध्ये स्वयंसेवी सेवाभावी स्वयंसेवकांकडून खिचडी, पाणी वाटप केले जाईल.
मंदिरात, दर्शन मंडपात आणि मंदिराभोवती चोऱ्या रोखण्यासाठी, चोरांवर नजर ठेवण्यासाठी नव्वद सीसीटीव्ही उभारले आहेत. याचबरोबर मंदिराच्या आतील बाजूस, दर्शन मंडपात आणि प्रवेशद्वारात पोलिसांचा बंदोबस्त ठेवला जाणार आहे.
वारी काळात संत ज्ञानेश्‍वर माउलींच्या संजीवन समाधीच्या लाइव्ह दर्शनाची सोय देवस्थानने केली आहे. यासाठी मंदिरात, दर्शन मंडपात आणि पुंडलिक मंदिरात स्क्रीन बसविले जाणार आहेत. वारीसाठी बाहेरून येणाऱ्‍या दिंड्यांना देवस्थानकडून निमंत्रण दिले आहे. दिंड्यांचे मंदिर प्रवेश पास वाटप सुरू आहे. सप्तमी आणि अष्टमीच्या दिवशी दिंड्यांना प्रवेश दिला जाईल. सध्या देऊळवाड्यावर विद्युत रोषणाई करण्याचे काम सुरू आहे. याचबरोबर वारी काळात देऊळवाडा, समाधी गाभारा आकर्षक फुलांनी सजविला जाणार आहे.
वारीसाठी येणाऱ्या वारकऱ्यांना संत ज्ञानेश्‍वरांच्या ज्ञानेश्‍वरीची पारायण प्रत ऐंशी रुपयांत ना नफा ना तोटा तत्त्वावर विक्री केली जाते. सुमारे पाच हजार ज्ञानेश्‍वरी पहिल्या टप्प्यात छपाई करून विक्रीसाठी मंदिरात ठेवल्या आहेत, तर लाडू प्रसाद म्हणून शेंगदाणा गूळ आणि बुंदीचे लाडूही बनविण्याचे काम सुरू आहे.
द्वादशीच्या दिवशी करण्यात येणाऱ्या रथोत्सवासाठी देवस्थानने जुना लाकडी रथ तयार ठेवला आहे. रथाचे पॉलिशिंग आणि त्यावर आकर्षक विद्युत रोषणाईचे काम सुरू आहे.