आळंदी, ता. १९ : नगर परिषदेमार्फत शिवसृष्टीजवळ नगर परिषद कार्यालयाकडे जाणाऱ्या मार्गात सुंदर स्वागत कमानीची उभारणी करण्यात आली आहे. यामुळे नागरिकांना नगर परिषद कार्यालय नेमके कुठे आहे, हे समजण्याबरोबरच शहराच्या वैभवातदेखील भर पडली आहे. नगर परिषदेने पावणेदोन कोटींचा निधी खर्च करून सुशोभिकरणाबरोबरच बसस्थानकावर सुलभ शौचालयाचेही काम सुरू केले आहे.
आळंदी नगर परिषदेची प्रमुख प्रशासकीय इमारत साधारणतः ७ वर्षांपूर्वी पडली असून, तेव्हापासून नगर परिषदेचा कारभार टाऊन हॉल इमारतीतून सुरू आहे. टाऊन हॉलची इमारत १९८९पासून अत्यंत जुन्या स्वरूपात होती; परंतु मुख्याधिकारी कैलास केंद्रे यांनी पदभार स्वीकारल्यानंतर या वास्तूचे नूतनीकरण केले. नूतनीकरणात दुरुस्ती, रंगरंगोटी, फर्निचरचे काम करण्यात आले. त्यानंतर कार्यालयासमोर रस्त्याचे काँक्रिटीकरण करून स्वागत कमानीची उभारणी करण्यात आली आहे. महाराष्ट्र सुवर्ण जयंती नगरोत्थान योजनेतून ९४ लाख खर्च करून हे कॉंक्रिटीकरण करण्यात आले, तर नगर परिषदेच्या १२ लाख रुपये स्वनिधीतून स्वागत कमान तयार करण्यात आली.
या विकासकामांमुळे या संपूर्ण परिसराच्या व पर्यायाने आळंदी शहराच्या वैभवात भर पडली असून, आळंदीकरांकडून याचे कौतुक केले जात आहे. याच्या शेजारीच असलेल्या बस स्थानकात पुरुष व स्त्रियांसाठी सुसज्ज टॉयलेट ब्लॉक उभारणीचे कामही आळंदी नगर परिषदेमार्फत सुरू झाले असून, प्रवाशांची गैरसोय यामुळे दूर होणार आहे. यासाठी ७४ लाखांचा निधी खर्च करण्यात येत आहे. सदर टॉयलेट ब्लॉकचे कामाबरोबरच बस स्थानकात खड्ड्यांचा प्रश्‍न कायमचा सोडविण्यासाठी काँक्रिटीकरण मंजूर करण्यात आले असून, लवकरच हे कामदेखील सुरू होणार असल्याची माहिती प्रशासक तथा मुख्याधिकारी कैलास केंद्रे यांनी दिली.