आळंदी, ता. २९ : ‘‘बालविवाह म्हणजे एका निष्पाप बालकाचे भविष्य अंधकारात ढकलणे आहे. हा सामाजिक गुन्हा थांबवण्यासाठी केवळ शासनच नव्हे तर समाजातील प्रत्येक घटकाने सजग होऊन पुढाकार घेतला पाहिजे. पालकांनी, शिक्षकांनी आणि ग्रामस्थांनी याबाबत जबाबदारीने वागले तर बालविवाह थांबवणे अशक्य नाही. बालपण वाचवण्यासाठी बालविवाह मुक्तीचा निर्धार सर्वांनी केला पाहिजे.’’ असे प्रतिपादन जिल्हा महिला आणि बाल विकास अधिकारी मनीषा बिरासिस यांनी आळंदीत केले
‘बालपण वाचवा, बालविवाह थांबवा’ या प्रेरणादायी संदेशासह मंगळवारी (ता. २७) आळंदीत भाग्यश्री विवाह मंगल कार्यालयात बालविवाह प्रतिबंधक कार्यशाळा पार पडली. जिल्हा महिला आणि बालविकास अधिकारी कार्यालय, केअरिंग हॅण्डस संस्था आणि बाल कल्याण समिती पुणे क्रमांक २ यांच्या वतीने कार्यशाळा घेण्यात आली. त्याची सुरुवात बालविवाह प्रतिबंधक मार्गदर्शक पुस्तिका आणि जनजागृती स्टिकर यांच्या प्रकाशनाने झाली. हे प्रकाशन जिल्हा महिला व बालविकास अधिकारी मनीषा बिरारीस, बाल कल्याण समिती अध्यक्ष नंदिता अंबिके, मार्गदर्शक सुमित्रा अष्टीकर, केअरिंग हॅण्डस संस्थेचे संस्थापक सचिव अंबादास चव्हाण, संकेत वाघमारे यांच्या हस्ते झाले.
यावेळी अंबिके म्हणाल्या, ‘‘बालविवाहाच्या विरोधात एकत्रितपणे उभे राहणे आणि कायद्याची माहिती समाजात पोहोचवणे अत्यंत गरजेचे आहे. ‘बालपण वाचवा’ ही केवळ घोषणा नसून ती समाजाच्या मानसिकतेतील परिवर्तनाचे प्रतीक आहे.’’ कार्यशाळेमध्ये बालकांनी सादर केलेली नाटिका हे या कार्यशाळेचे विशेष आकर्षण ठरले. नाटिकेच्या माध्यमातून बालविवाहाचे दुष्परिणाम प्रभावीपणे दर्शविण्यात आले. कार्यक्रमाच्या शेवटी सर्वांनी ‘बालविवाह प्रतिबंधक प्रतिज्ञा’ घेतली.