आळंदी, ता. १ : येथे वर्षानुवर्षे पिढी जात अवैध दारू विक्री करणाऱ्या चावडी चौक आणि चाकण चौक येथील दोन व्यावसायिकांवर आळंदी पोलिसांनी छापा मारून गुन्हा दाखल केला.
शनिवारी (ता. ३१) सकाळच्या वेळी ही कारवाई केली. याप्रकरणी चाकण चौक येथे अवैध दारू धंदा करणाऱ्या रेखा ज्ञानेश्वर कांबळे (अंदाजे वय ३७) आणि कौस्तुभ दिलीप दौंडकर (अंदाजे वय ३८) यांच्याविरोधात आळंदी पोलिस ठाण्यात तक्रार दाखल केली आहे.
याबाबत माहिती देताना आळंदी पोलिसांनी सांगितले की, आळंदीतील मंडलाधिकारी कार्यालयामागील चावडी चौकातील एका धर्मशाळेच्या बाजूला असलेल्या घरामध्ये कौस्तुभ दौंडकर हा २७५ रुपये किमतीची देशी दारू बाळगून व्यवसाय करत होता. त्यास आळंदी पोलीस पकडण्यासाठी गेले असता त्याने पोबारा केला. तर आळंदीतील प्रमुख वर्दळीचे ठिकाण असलेल्या चाकण चौकामध्ये रेखा कांबळे रात्री साडेआठच्या दरम्यान २१०० रुपये किमतीचे देशी दारू बाळगत असताना पोलीस तिला पकडण्यासाठी गेले तेव्हा तीही पोबारा करून पळून गेली. दौंडकर आणि कांबळे यांच्याविरुद्ध फिर्याद दाखल केली आहे. याबाबत अधिक तपास आळंदी पोलीस करत आहेत.
आषाढी वारीच्या पार्श्वभूमीवर ही कारवाई केल्याने शहरातील अन्य दारू धंद्यांचे धाबे दणाणले आहे. दरम्यान दोन्ही दारू धंदे अनेक वर्षांपासून मध्यवर्ती ठिकाणी चालत असल्याने आणि पोलीस ठाण्यापासून काही क्षणाच्या अंतरावर असल्याने आळंदी करांमध्ये याबाबत चर्चा होती. या कारवाईमुळे शहरातील अन्य ठिकाणी म्हणजेच पद्मावती रस्ता, वडगाव रस्ता, मरकळ रस्ता, तसेच खंडोबा मंदिराकडे जाणाऱ्या रस्त्यावरील दारू धंद्यांवर कारवाई कधी होणार? याबाबत उत्सुकता आहे.