आळंदी, ता. ६ : संत ज्ञानेश्‍वर माउली आणि त्यांच्या भावंडांच्या वास्तव्याने पावन झालेल्या सिद्धबेटच्या जागेमध्ये मद्यपींनी अड्डा केला आहे. दर्शनासाठी आलेल्या भाविकांना येथे ठिकठिकाणी मद्याच्या रिकाम्या बाटल्या अस्ताव्यस्त पडल्याचे चित्र दिसून येत आहेत.
आळंदीसाठी मंजूर झालेल्या राज्यतीर्थ क्षेत्र विकास आराखड्याच्या माध्यमातून सुमारे बत्तीस कोटी रुपयांहून अधिक निधी सरकारने खर्च केला. मात्र तरीही सिद्धबेटची भूमी अद्याप दुरवस्थेतच असल्याचे चित्र आहे.
आळंदीमध्ये माउलींच्यासमाधी दर्शनासाठी आलेला भाविक नंतर सिद्धबेटमध्ये दर्शनासाठी जात असतो. मात्र तेथे आल्यानंतर भाविकांना सर्वप्रथम प्रवेशद्वारातच कचरा तर कधी चिखलाचा सामना करावा लागतो. प्रवेशद्वारात वाहन लावण्यासाठीही जागा नाही. सिद्धबेटमध्ये प्रवेश केल्यानंतर आतमध्ये ठिकठिकाणी खुरटी गवते वाढलेली आहेत. काही ठिकाणी समाजकंटकांनी चांगली झाडेही तोडली होती. सामाजिक संस्था तसेच वृक्षप्रेमी लोकांनी रोपे लावली, स्वच्छता केली. मात्र स्थानिक पातळीवर प्रशासनाने पूर्णपणे दुर्लक्ष केल्याने सिद्धबेटची दुरवस्था दिसून येते. आतल्या बाजूस तर मद्यपींनी दारू पिण्यासाठीचा अड्डाच बनविला आहे. यामुळे भाविकांनाही या मद्यपींचा उपद्रव अधूनमधून सहन करावा लागत आहे. सिद्धबेट परिसरात वारकरी विद्यार्थ्यांच्या निवास शाळा आहेत. वारकरी विद्यार्थी याठिकाणी पखवाज वाजविणे, गीता, ज्ञानेश्‍वरीच्या अभ्यासासाठी निसर्गाच्या सानिध्यात बसण्यासाठी येतात. मात्र अशा उपद्रवी मद्यपींकडून बहुतांशवेळा त्यांनाही लक्ष केले जाते. सरकारने याकडे लक्ष देण्याची गरज आहे.

निधी खर्चूनही काम नाही
तीर्थक्षेत्रातून ३२ कोटी रुपयांचा निधी खर्चूनही विशेष काम झाले नाही. पाच एकराहून अधिक जागा इंद्रायणीकाठी शासनाच्या नावाने सातबारा सदरी नोंद आहे. मात्र प्रशासनाला काही देणेघेणे नसल्याने नियमित पुरेशी सुरक्षा व्यवस्था, स्वच्छतेसाठी पुरेसे कर्मचारी नेमणे गरजेचे आहे. सिद्धबेटच्या जागेत दक्षिणापेटीही अनधिकृत ठेवली आहे. तर अनेकजण प्रशासनाची परवानगी न घेताच परस्पर या ठिकाणी विविध उपक्रम राबवितात. त्याकडे सरकारने लक्ष देणे गरजेचे असल्याचे नागरिकांचे म्हणणे आहे.