आळंदी, ता. १९ : ‘‘ज्ञानेश्‍वरीत विश्‍वशांती निर्मितीचा मूलभूत विचार समाविष्ट आहे. त्यामुळे आळंदी हेच विश्‍वातील एकमेव विश्‍वशांती केंद्र आहे. जो पर्यंत मानवाला अध्यात्माची जाणीव होणार नाही तो पर्यंत शांतीचा विचारही करता येणार नाही. असे प्रतिपादन डॉ. तुकाराम महाराज गरुड ठाकुरबुवा दैठणेकर यांनी व्यक्त केले.
विश्‍वशांती केंद्र (आळंदी), क्षेत्र आळंदी-देहू परिसर विकास समिती यांच्या वतीने आळंदी येथे पालखी प्रस्थान सोहळ्याच्या निमित्ताने युनेस्को अध्यासन अंतर्गत लोकशाही, मानवाधिकार, शांती आणि सहिष्णुतेसाठीचा लोकशिक्षणाच्या अभिनव उपक्रमाच्या उद्‍घाटन प्रसंगी प्रमुख पाहुणे म्हणून ते बोलत होते.
या प्रसंगी अध्यक्षस्थानी एमआयटी वर्ल्ड पीस युनिव्हर्सिटीचे संस्थापक अध्यक्ष प्रा. डॉ. विश्‍वनाथ कराड होते. बाळासाहेब महाराज काशीद, भालचंद्र नलावडे, सुरेश वडगावकर, नंदकुमार वडगावकर, नागपूर विद्यापीठाचे माजी कुलगुरू डॉ. एस. एन. पठाण, डॉ. सुदाम पानेगावकर, विठ्ठल काळेखे उपस्थित होते.
कराड म्हणाले, ‘‘ज्ञान, भक्ती आणि कर्म ही परंपरा वारकरी संप्रदायाची आहे. सद्‍गुणांची पूजा हीच खरी ईश्‍वर पूजा. भविष्यात वारकरी संप्रदायच जगाला सुख समाधान आणि शांतीचा मार्ग दाखवेल. हा मार्ग तीर्थ क्षेत्राकडून ज्ञान तीर्थ क्षेत्राकडे जाण्याचा आहे.
डॉ. पठाण म्हणाले, ‘‘जाती-पातीमध्ये विभागलेल्या लोकांना एकत्रित करण्याचे व त्यांच्यात अस्मिता निर्मितीचे कार्य संत ज्ञानेश्‍वर माउली यांनी केले आहे. ते देशातील सर्वात मोठे समाज सुधारक आहेत. त्यांनी संपूर्ण समाज सुधारला आहे. वारकरी म्हणजे सज्जनांची मांदियाळी, ज्या गावात वारकरी आहे ते गाव सुखी आहे.’’ महेश महाराज नलावडे यांनी प्रास्ताविक केले.
सूत्रसंचालन शालिकराम खंदारे यांनी केले.