आळंदी, ता. ८ : कैवल्य साम्राज्य चक्रवर्ती श्री ज्ञानेश्वर माउली संस्थान आळंदी यांच्या वतीने संत मुक्ताई मातेस साडीचोळी अर्पण करण्यात आली. आषाढी वारीचा सोहळा म्हणजे भक्ती, परंपरा आणि प्रेम यांचा अविभाज्य संगम. या सोहळ्याच्या निमित्ताने एक हृदयस्पर्शी परंपरा जपत संत ज्ञानदेवकडून धाकटी बहीण मुक्ताबाईंना साडीचोळी विधिवत पूजन करून दिली. या अनोख्या भेटीने उपस्थित भाविकांच्या डोळ्यांच्या कडा पाणावल्या.
पंढरपूर येथील संत मुक्ताबाई मठात त्रयोदशीच्या दिवशी दरवर्षी जपली जाणारी ही परंपरा यंदाही मोठया भक्तिभावात पार पडली. संत ज्ञानेश्वर महाराज पालखी सोहळाप्रमुख डॉ. भावार्थ देखणे यांच्या हस्ते संत मुक्ताई माता पादुकांना महापूजा व अभिषेक घालण्यात आला. यावेळी मुक्ताईनगर आदिशक्ती मुक्ताबाई संस्थान अध्यक्ष ॲड. रवींद्र पाटील, रवींद्र महाराज हरणे, शंकरराव पाटील, उद्धव महाराज जुनारे, ज्ञानेश्वर हरणे आणि शेकडो वारकरी उपस्थित होते.
या आषाढी वारीतील परंपरेप्रमाणे साडीचोळी मुक्ताईस दिवाळीच्या भाऊबीजेला परिधान करतात. तर मुक्ताई देवस्थानकडून माउलींना रक्षाबंधन दिवशी राखी दिली जाते. कार्तिकी वारीत मुक्ताई भावाच्या समाधी सोहळ्यास येतात. ही परंपरा आजही तितक्याच भक्तिभावाने जपली जाते. संत सोपानकाका व संत ज्ञानेश्वर महाराज यांच्या पालखी भेटीप्रमाणेच मुक्ताई-माउली यांचा हा सोहळा भावनिक अनुभव देणारा आहे.