आळंदी, ता. २९ : सनईचे मंजुळ सूर, आकर्षक रांगोळी आणि फुलांची सजावट अशा पवित्र भक्तिमय वातावरणात आळंदीतील सुवासिनींनी चांदीच्या नागोबाचे प्रतिकात्मक पूजन करत श्रावणातील पहिला सण मोठ्या उत्साहात साजरी केला.
नागपंचमीनिमित्त शेतकऱ्यांचा मित्र असलेल्या नागदेवतेची पूजा करण्याची परंपरा मोठ्या भक्तिभावाने आजही जपली जात आहे. आळंदी देवस्थानच्या वतीने पूजनासाठी चांदीचा नाग बनवण्यात आलेला आहे. आज सकाळी आळंदीकर व देवस्थानच्या वतीने सनई चौघड्यांच्या स्वरात देऊळ वाड्यापासून नगरपालिका चौकापर्यंत नागदेवतेच्या पालखीची मिरवणूक काढली होती. ही मिरवणूक जुन्या नगरपरिषदेच्या परिसरात आल्यावर सुवासिनी महिलांनी चांदीच्या नागदेवतेचे विधीवत पूजन केले. नागदेवतेस दूध, साखर, लाह्या, आघाडा, दूर्वा अर्पण करण्यात आली. यानंतर नागदेवतेची पालखी लक्ष्मी नारायण मंदिर, राम मंदिर परिसरात नेण्यात आली. पुढे ती माऊलींच्या मंदिरातील पालखी मंडपात नेण्यात आली. या ठिकाणी विशेष पूजन, अभिषेक व पुरणपोळीचा नैवेद्य दाखवण्यात आला. याप्रसंगी भाविकांची मोठ्या प्रमाणावर गर्दी झाली होती.
मंदिर समितीच्या वतीने पूजेसाठी योगदान देणाऱ्या मानकरी महिलांचा गौरव म्हणून त्यांना नारळ व प्रसाद देऊन सन्मानित करण्यात आले. यात पुष्पा चिताळकर, रेखा कुऱ्हाडे, ज्योती चिताळकर, राजश्री कुऱ्हाडे, सृष्टी घुंडरे, लक्ष्मी कुऱ्हाडे व परिणिती कुऱ्हाडे महिला सहभागी होत्या. तसेच माजी नगराध्यक्ष राहुल चिताळकर, योगीराज कुऱ्हाडे, विठ्ठल घुंडरे, भीमाशंकर वाघमारे, बारकू वाघमारे, पुरुषोत्तम वाघमारे आदी उपस्थित होते. नागपंचमीचा हा पारंपरिक सण आळंदीत भक्ती, समर्पण आणि सामाजिक सहभाग यांचे प्रतीक ठरला. श्रद्धाळू नागरिकांच्या उपस्थितीने वातावरण भक्तिमय झाले होते. नागदेवतेच्या पूजनासह, संत परंपरेचा वारसा पुढे नेणाऱ्या आळंदीतील या धार्मिक सोहळ्याने सणाच्या पावित्र्यात भर घातली.