आळंदी, ता. ६ : सिद्धबेट येथे पखवाज वाजवण्याचा सराव करणाऱ्या वारकरी विद्यार्थ्याला तिघांनी बेदम मारले. याप्रकरणी हर्षद विकास मालप, पवन पंडित सांगळे (दोघेही रा. केळगाव) आणि शुभम रामदास भालेराव (रा. इंद्रायणी नगर आळंदी) यांच्यावर गुन्हा दाखल केला आहे.
सतीश विठ्ठल खरसाडे (रा. केळगाव) यांनी आळंदी पोलिस ठाण्यात फिर्याद दिली आहे. आळंदी पोलिसांनी दिलेल्या माहितीनुसार सतीश खरसाडे हा नेहमीप्रमाणे सिद्ध बेटमध्ये पखवाज वाजवण्याचा सराव करतो. रविवारी (ता. ५) सायंकाळी पाच वाजता पखवाज वाजवण्याचा सराव करताना हर्षद मालक आणि त्याचे दोन मित्रांनी तुझ्या पखवाज वाजविल्यामुळे आम्हाला त्रास होतो. या कारणावरून अश्‍लील शिवीगाळ आणि दमबाजी केली. तसेच सतीश खरसाडे राहत असलेल्या धर्म शाळेत जाऊन टाकळी दांडक्याने तसेच पट्ट्याने मारहाण केली. एका आरोपीच्या हातामध्ये स्टीलचे कडे असल्याने ते लागून हाताला आणि चेहऱ्याला जखम झाली आहे. तसेच पळून जात नंतर बाहेर भेटल्यावर दाखवतो असे म्हणून धमकी दिली.