आळेफाटा, ता. ११ : जाधववाडी (ता. जुन्नर) येथील श्री जगदंबा माध्यमिक विद्यालयात मॅजिक बस इंडिया फाउंडेशन आणि नेस्ले हेल्दी किड्स यांच्या माध्यमातून आंतरराष्ट्रीय स्वयंसेवक दिवस साजरा करण्यात आला. यामध्ये सर्वप्रथम मॅजिक बसचे युवा मार्गदर्शक शुभम मिसाळ यांनी विद्यालयातील मुला-मुलींना शाश्‍वत विकास ध्येयांवर मार्गदर्शन केलं. त्यात गरीबी निर्मूलन, निरोगीपणा आणि क्षेमकुशल, उपासमारीचे समूळ उच्चाटन, गुणवत्तापूर्ण शिक्षण, लिंग समभाव, पर्यावरणाचे संरक्षण आदी विषयांचा समावेश होता. यानंतर प्रत्यक्ष विद्यार्थ्यांनी या विषयांवर स्वतःचे विचार पोस्टर वरती लिहून सादरीकरण केले तसेच या आंतरराष्ट्रीय स्वयंसेवक दिनाच्या निमित्ताने विद्यालयातील मुलांना एक चांगला स्वयंसेवक म्हणून समाजात जगत असताना आपली स्वतःची जबाबदारी आणि कर्तव्य नेमकी कोणती आहेत, हे अतिशय सकारात्मकरित्या समजून सांगितले.
हा आंतरराष्ट्रीय स्वयंसेवक दिवस यशस्वीपणे पार पाडण्यासाठी श्री जगदंबा विद्यालयाचे मुख्याध्यापक संतोष कसाळ, धनश्री सुर्वे आणि इतर शिक्षकांनी सहकार्य केले.