आळेफाटा, ता. २ : आळे (ता. जुन्नर) येथील ज्ञानमंदिर हायस्कूलच्या इयत्ता दहावीच्या १९७९ च्या विद्यार्थ्यांचा स्नेहमेळावा रविवारी (ता. २) आळेफाटा येथील साईलिला हॉलमध्ये उत्साहात पार पडला. तब्बल ४६ वर्षांनी जुन्या वर्ग मित्र-मैत्रिणींची भेट यानिमित्ताने झाली. यामुळे या बॅचचे सारेजण आनंदरंगात न्हाऊन निघाले. प्रत्येकाने व्यक्त केलेल्या अर्थपूर्ण मनोगतामधून जुन्या आठवणींना उजाळा मिळाला.
अगोदरपासूनच पावसाळी वातावरण होते. यामुळे हे स्नेहसंमेलन होईल की नाही, अशी शंका होती. शेवटी नियोजनात प्रथमपासूनच पुढे असलेल्या काही विद्यार्थ्यांच्या आग्रहामुळे हे स्नेहसंमेलन ६० पेक्षा अधिक विद्यार्थी विद्यार्थिनींच्या उपस्थित पार पडले.
दहावीच्या या विद्यार्थ्यांशी अगदी पहिल्या इयत्तेपासून जोडले गेलेले पंचायत समितीचे माजी सदस्य ज्ञानराज इंग्लिश मीडियम स्कूलचे अध्यक्ष नेताजी डोके आणि साईलिला हॉलचे संचालक राजेंद्र कुऱ्हाडे यांनी केलेल्या विशेष सहकार्यामुळे हा कार्यक्रम यशस्वीरीत्या पार पडला. असे स्नेहसंमेलन दरवर्षीच घेत जा त्यासाठी राजेंद्र आणि माझे पूर्ण सहकार्य राहील, अशी ग्वाही डोके यांनी यावेळेस बोलताना दिली.
स्नेहसंमेलनात दीपप्रज्वलन, सामूहिक जनगणमन, पसायदान झाले. यावेळेस सर्व विद्यार्थी विद्यार्थिनी हे आपल्या शालेय जीवनाच्या आठवणींमध्ये डूबून गेले होते. दहावी १९७९ एसएससी बॅचमध्ये असलेल्या १८ हून अधिक विद्यार्थी आणि ज्ञानमंदिर हायस्कूलच्या काही शिक्षकांचा गेल्या काही वर्षांत मृत्यू झाला. त्यांना याप्रसंगी आदरांजली अर्पण केली.
याप्रसंगी प्रत्येकाने आपापला परिचय देण्याबरोबरच मनोगत थोडक्यात व्यक्त केले.
हे स्नेहसंमेलन यशस्वी करण्यासाठी नेताजी डोके, मुन्नाशेठ कुऱ्हाडे, राजेंद्र गुंजाळ, ज्ञानेश्वर शिंदे, रवींद्र वाघोले, पाडुरंग गडगे, नाथा बाम्हणे, शिवाजी भुजबळ, बालकृष्ण कुऱ्हाडे यांनी मेहनत घेतली.
यावेळी माजी विद्यार्थी मनोहर जोशी, पत्रकार नारायण जाधव, सुरेश राहिंज, मिनाक्षी पाठक मिसर, साधना वाव्हळ अंगरकर, शालिनी बढे, डॉ. सुनील शेटे, दशरथ गाढवे, मीना डोके, मंगल वऱ्हाडी, विलास जाधव, जालिंदर जाधव, होनाजी गुंजाळ, रामदास चव्हाण, संजय कुऱ्हाडे आदी माजी विद्यार्थी उपस्थित होते. रवींद्र वाघोले यांनी सूत्रसंचालन केले. मनोहर जोशी यांनी प्रास्ताविक केले. रवींद्र गुंजाळ यांनी आभार मानले.