आळेफाटा, ता. ९ ः आळे (ता. जुन्नर) येथील ज्ञानमंदिर हायस्कूल व कनिष्ठ महाविद्यालयातील विद्यार्थ्यांना परकीय भाषा शिक्षणाचे महत्त्व सांगण्यात आले. पुणे येथील फॉरेन लॅंग्वेज ऑनलाइन ॲप्लिकेशन (फ्लोआ) या संस्थेचे उदय धनराज सोनवणे यांनी विद्यार्थ्यांना याबाबत मार्गदर्शन केले. ‘‘जर्मन आणि फ्रेंच भाषा शिकल्याने विद्यार्थ्यांच्या बुद्धीला चालना मिळते, संभाषण कौशल्य वाढते, आत्मविश्वास निर्माण होतो, लक्ष केंद्रित होऊन एकाच वेळी अनेक कामे करण्याची सवय लागते आणि उच्चशिक्षण व नोकरीच्या संधी उपलब्ध होतात, असे सोनवणे यांनी या वेळी सांगितले. तसेच, विद्यार्थ्यांना उदाहरणादाखल इंग्रजी महिन्यांची नावे जर्मन भाषेमध्ये कशी लिहावीत याचेही प्रात्यक्षिक दिले. विद्यार्थ्यांनी विचारलेल्या शंकांचेही निरसन त्यांनी केले. या प्रसंगी प्राचार्य संदीप भवारी, उपप्राचार्य सुरेश कुऱ्हाडे, उपमुख्याध्यापक सुनील कोते, ज्ञानेश्वर वाघ, संतोष सहाने आदी उपस्थित होते.