आळेफाटा, ता. १६ : राजुरी (ता. जुन्नर) येथील श्री खंडेराय भैरवनाथ यात्रोत्सवानिमित्त आयोजित कुस्त्यांच्या जंगी आखाड्यात महाराष्ट्रासह हरियाणातील पहिलवानांनी शड्डू ठोकला. आखाड्यात १५० हून अधिक झालेल्या कुस्त्यांना दोन लाख रुपयांच्या रोख बक्षिसांचे वाटप करण्यात आले.
या आखाड्यातील मुख्य लढत पहिलवान अनिल लोणारी (शेगाव) पहिलवान विकास कुमार (हरियाणा) यांच्यात झाली. ही कुस्ती बरोबरीत सुटल्याने दोघांनाही विभागून बक्षीस देण्यात आले. पहिलवान नवनाथ चोहे व पहिलवान आकाश चव्हाण यांना मानाचे चांदीचे कडे, तर शिवा उचळे याने मानाची ढाल व रोख रक्कम पटकावली. मुलींच्या कुस्त्यांनीही प्रेक्षकांची मने जिंकली.
देवस्थानचे अध्यक्ष बाळासाहेब औटी, अभिनेते अविनाश पाटील आवटे व पदाधिकाऱ्यांच्या हस्ते बक्षीस वितरण झाले. आखाड्यासाठी अविनाश औटी यांनी २५ हजार रुपये, तर अशोकराव आवटी यांनी चांदीची गदा व किरण व बाळासाहेब औटी यांनी चांदीचे कडे दिले. एच. पी. नरसोडे, बाळासाहेब कुऱ्हाडे व प्रकाश जोंधळे यांनी पंच म्हणून काम पाहिले.