आळेफाटा, ता. १६ : रानमळा (ता. जुन्नर) येथे चोरट्यांनी पाच घरे फोडली. त्यातील एका घरातील जिजाबाई गबाजी गुंजाळ (वय ८५) यांना लोखंडी रॉडने मारहाण केली. तिचे अर्धा तोळे सोन्याचे दागिने व तीन हजार रुपयांची रोख रक्कम लुटून नेली.
याबाबत आळेफाटा पोलिस ठाण्याने दिलेल्या माहितीनुसार, रानमळा (ता.जुन्नर) येथील ढोली मळ्यात राहत असलेल्या जिजाबाई गुंजाळ (वय ८५) या एकट्या घरात राहतात. चोरट्यांनी गुरुवारी (ता.१६) पहाटे जिजाबाई यांच्या गळा तसेच कानातील दागिने तसेच कपाटातील तीन हजार रुपयांची रोख रक्कम चोरून नेली. त्यांना लोखंडी रॉडने डोक्यावर मारहाणही केली.
दरम्यान, कुसुम शिवाजी गुंजाळ यांच्या घराची कौले काढून चोरट्यांनी घरात प्रवेश केला. यावेळी कपाटाचे कुलूप तोडत असताना घरातील लोकांना जाग आली. त्यांनी आरडाओरडा केल्याने चोरट्यांनी पळ काढला. पाबळे मळ्यात राहत असलेले शिवाजी धोंडिबा पाबळे, ज्ञानेश्वर तान्हाजी पाबळे, पंढरी नाना गुंजाळ यांच्याही बंद घरांचे कुलूप तोडून घरातील कपाटे चोरट्यांनी फोडली.
जबर मारहाण केलेल्या गुंजाळ यांच्यावर आळेफाटा येथील खासगी दवाखान्यात उपचार सुरू आहेत. घटनास्थळी आळेफाटा पोलिस ठाण्याचे पोलिस निरीक्षक विश्वास जाधव यांनी येऊन पंचनामा केला आहे.