बेल्हे, ता. ११ : पारगाव तर्फे आळे (ता. जुन्नर) येथे मीना शाखा कालव्याचा रब्बी हंगाम २०२४-२५ आवर्तन पूर्व आढावा बैठक, नुकतीच घोड-कुकडी प्रकल्प कालवा सल्लागार समितीचे सदस्य व मीना शाखा कालवा समितीचे अध्यक्ष प्रकाश वायसे यांच्या अध्यक्षतेखाली घेण्यात आली.
पारगाव तर्फे आळे येथे झालेल्या बैठकीमध्ये पाणी वापर संस्था सक्षमीकरणासाठी आवश्यक बाबी, रब्बी हंगामातील पाण्याचे नियोजन करणे, पाणी वापर संस्थांनी सीसीएच्या प्रमाणात मागणी क्षेत्र देणे, सक्षम सचिवाची नेमणूक करणे, वितरिकास्तरीय संस्था तयार करणे, संस्थांचे ऑडिट, अनुदान आदी विषयांवर सविस्तर चर्चा करण्यात आली. याप्रसंगी प्रकल्पाचे उपविभागीय अधिकारी आर. जी. हांडे, जांबुत शाखा अधिकारी एस. टी. दाते, टाकळी हाजी शाखा अधिकारी पी. व्ही. पाटील, शिरोली शाखा अधिकारी ए. एल. कुमावत आदी मान्यवर उपस्थित होते. तसेच मीना शाखा कालव्यावरील पाटबंधारे विभागाचे सर्व कर्मचारी संस्थांचे पदाधिकारी व सभासद शेतकरी उपस्थित होते.
यावेळी मीना शाखा कालव्यावरील अडचणी सोडवण्यासाठी आपण सर्वतोपरी प्रयत्न करू. आवश्यकता भासेल तेव्हा सर्वजण सोबत रहा, मीना शाखा कालवा हा एक मॉडेल कालवा बनवू असे मत प्रकाश वायसे यांनी व्यक्त केले. यावेळी ज्ञानेश्‍वर उंडे, इंद्रभान गायकवाड, धोंडिभाऊ भोर, विश्‍वनाथ येवले, संपतराव पानमन, अंकुश घोडे आदींनी पाणी वापर संस्थांना येणाऱ्या अडचणी विषयी समस्या मांडल्या. प्रास्ताविक सुभाष झिंजाड यांनी, तर आभार पांडुरंग डुकरे यांनी मानले.