बेल्हे, ता. ११ : निमगाव सावा (ता. जुन्नर) येथे मोरया प्रतिष्ठान व ग्रामस्थांच्या वतीने दिवंगत चंद्रशेखर (अण्णा) बाणखेले यांच्या पुण्यतिथिनिमित्त नुकतेच मोफत सर्वरोग निदान व रक्तदान शिबिर आणि साहित्य वाटप उपक्रमाचे आयोजन केले होते. निमगाव सावा येथील प्राथमिक आरोग्य केंद्र व ग्रामपंचायतीच्या सभागृहात हा कार्यक्रम झाल्याचे प्रतिष्ठानचे संस्थापक किरण गोत्राळ यांनी सांगितले. यादरम्यान, रक्तदान, नेत्र तपासणी, मधुमेह, स्त्रीरोग निदान, हाडांच्या समस्या, संसर्गजन्य आजार, कावीळ, रक्ताचे आजार, उच्च रक्तदाब आदी विविध आजारांच्या तपासण्या करण्यात आल्या. या उपक्रमाचे हे आठवे वर्ष आहे. या शिबिरात एकूण १ हजार १४० जणांनी नावनोंदणी करून प्रत्यक्ष सहभाग घेतला. दरम्यान, २११ रुग्णांना चष्मे वाटप, तर २५ रुग्णांना वॉकिंग स्टिक देण्यात आल्या. तसेच रक्तदान शिबिरात एकूण ३४७ बाटल्या रक्त संकलित करण्यात आले.