पारगाव, ता. ८ : दुष्काळी गाव म्हणून ओळखल्या जाणाऱ्या धामणी (ता. आंबेगाव) परिसरात सुमारे साडेतीन ते चार कोटी रुपये खर्च करून सुरू होत असलेल्या नऊ उपसा सिंचन योजना अडचणीत आल्या आहेत. राज्य सरकारने शेती पंपाच्या नवीन धोरणातून दुष्काळी गावांना वगळून तातडीने नवीन वीज जोड द्यावे, अशी मागणी परिसरातील शेतकऱ्यांनी केली आहे.

धामणीतील शेतकरी एकत्र येत लाखो रुपये खर्च करून सामुदायिक उपसा सिंचन योजना राबवण्यास सुरुवात केली. मात्र, राज्यात यापुढे शेतीपंपासाठी नवीन वीज जोड देणे बंद केले असून, सोलरवर शेतीपंप चालवावा, असे शासकीय धोरण निच्छित केले आहे. परंतु जास्त अश्वशक्तीच्या शेतीपंपासाठी सोलर यंत्रणा उभी करण्यासाठी जागा उपलब्ध करणे अवघड असून, त्यासाठी जास्त खर्च येणार आहे. यामुळे उपसा योजना अडचणीत आल्या आहेत.

दुष्काळी गावाचा शिक्का पुसण्यासाठी धामणीतील शेतकऱ्यांनी कंबर कसली आहे. गावातील प्रत्येक मळ्यातील शेतकऱ्यांनी अधिका-अधिक शेतकरी एकत्र आले आहेत. शासनाच्या कोणत्याही मदतीची वाट न पाहता गावजवळनूच बढेकरमळा परिसरातून जात असलेल्या डिंभे धरणाचा उजव्या कालव्यावर सिंचन योजना राबवून जलवाहिनीद्वारे शेतीसाठी पाणी नेण्यासाठी लोकवर्गणी तसेच बँक, पतसंस्था यांच्याकडून कर्ज काढून सामुदायिक सिंचन योजना करण्याचा निर्णय घेतला होता. दोन आठवड्यापूर्वी एकूण नऊ उपसा सिंचन योजनेच्या कामाला सुरुवात झाली एका सिंचन योजनेसाठी एकूण ४० ते ५० लाख रुपये खर्च येत आहे. या सर्व सिंचन योजनेचे ६० ते ७० टक्के काम पूर्ण झाले आहे.

दरम्यान, दिलीप वळसे पाटील यांनी नवीन उपसा सिंचन योजनांच्या रोहित्रासाठी लागणारा निधी उपलब्ध करून शासनाच्या विविध विभागाकडून लागणारी मदत मिळवून देण्याचे आश्वासन दिले होते. परंतु राज्य शासनाच्या नवीन धोरणानुसार शेतीपंपाना नवीन वीज जोड देणे बंद केल्याने या सर्व उपसा सिंचन योजना अडचणीत आल्या आहे.

माजी सहकारमंत्री दिलीप वळसे पाटील व पुणे म्हाडाचे अध्यक्ष शिवाजीराव आढळराव पाटील यांनी धामणी गावातील या सर्व उपसा सिंचन योजनांच्या साठी वीज जोड मिळण्यासाठी राज्य शासनाकडे प्रयत्न करावेत, अशी मागणी परिसरातील शेतकऱ्यांनी केली आहे. नवीन वीज जोड न मिळाल्यास लाखो रुपये खर्च करून तयार झालेल्या या उपसा सिंचन योजना अडचणीत येतील.
- रवींद्र करंजखेले, माजी पंचायत समिती सदस्य
05571