पारगाव, ता. १९ : आंबेगाव तालुक्याच्या पूर्व भागातील महत्त्वाची बाजारपेठ असलेल्या लोणी येथील टपाल कार्यालयातील इंटरनेट सेवा १० दिवसांपासून बंद पडली आहे. त्यामुळे या कार्यालयातील आर्थिक व्यवहार ठप्प झाल्याने परिसरातील चार गावांतील नागरिकांची गैरसोय झाली आहे.
लोणी येथील टपाल कार्यालयाअंतर्गत लोणी, खडकवाडी, वाळुंजनगर व रानमळा ही चार गावे येतात. १० दिवसापासून येथील पोस्ट ऑफिस मधील इंटरनेट सेवा बंद पडल्याने व्यवहार ठप्प झाले आहे. आर्थिक व्यवहार कोलमडल्याने घरकुलाचे हप्ते, पीएम किसान योजनेचे अनुदान, तसेच बचत प्रमाण पत्राचे पैसे काढणे आदी व्यवहार ठप्प झाले आहेत. त्यामुळे नागरिकांची गैरसोय झाली आहे. आता पेरणीचे दिवस आल्याने शेतकऱ्यांची अडचण होऊ शकते. त्यामुळे टपाल कार्यालयातील इंटरनेट सेवा त्वरित सुरळीत करावी, अशी मागणी माजी सरपंच उद्धवराव लंके यांनी केली आहे.
या संदर्भात लोणी टपाल कार्यालयाचे पोस्ट मास्तर राजू पोटे यांच्याशी संपर्क केला असता त्यांनी सांगितले की, इंटरनेट सेवा सुरळीत करण्यासाठी वरिष्ठ कार्यालयाला वारंवार कळवले आहे. लवकरच सेवा सुरळीत होईल.