पारगाव, ता. २४ : खोडद (ता. जुन्नर) येथील जीएमआरटी या संस्थेने राष्ट्रीय विज्ञान दिवसाच्या निमित्ताने आयोजित केलेल्या ‘राष्ट्रीय ऑनलाइन विज्ञान प्रदर्शन २०२५’ मध्ये विद्या विकास मंदिर (अवसरी बुद्रुक, ता. आंबेगाव) या विद्यालयातील सार्थक संभाजी भोर या विद्यार्थ्याच्या ‘प्लास्टिक पायरोलिसीस’ या प्रकल्पाचा राष्ट्रीय पातळीवर इयत्ता अकरावी व बारावी गटामध्ये प्रथम क्रमांक आला आहे, अशी माहिती विद्यालयाच्या प्राचार्या माधुरी खानदेशे यांनी दिली.
या प्रदर्शनामध्ये देशभरातून विविध राज्यांतील ४३० शाळा व महाविद्यालयांतील ९०२ प्रकल्पांनी सहभाग नोंदविला होता. यातून सार्थक भोरच्या प्रकल्पाची प्रथम क्रमांकासाठी निवड झाली आहे. या प्रकल्पामधे निरुपयोगी प्लास्टिक बाटल्यांपासून हायड्रोजन व वेगवेगळ्या प्रकारची संतृप्त हायड्रोकार्बन संयुगे इंधन म्हणून तयार होतात. या प्रकल्पासाठी त्याला प्रा. रामानंद वळसे व सुनीता शेळके-हिंगे यांनी मार्गदर्शन केले. या प्रदर्शनातील पुरस्कार प्राप्त विद्यार्थ्यांचा पारितोषिक वितरण समारंभ मंगळवारी (ता. २०) पुण्यातील आयुका संस्थेच्या आवारातील ‘एनसीआरए’ संस्थेच्या सभागृहामधे पार पडला. पारितोषिक वितरण समारंभासाठी एनसीआरएचे प्रमुख प्रा. यशवंत गुप्ता, प्रा. दिव्य ओबेरॉय, प्रा. ईश्‍वर चंद्रा, डॉ. जी. के. सोळंकी, नीलेश छडवेलकर हे उपस्थित होते.
त्याच्या या यशाबद्दल शिक्षण प्रसारक मंडळी संस्थेचे अध्यक्ष ॲड. विष्णूकाका हिंगे पाटील, उपाध्यक्ष योगेश चव्हाण, सचिव वसंतराव हिंगे, खजिनदार दीपक हिंगे व संचालक यांनी सार्थकचे अभिनंदन केले आहे.