पारगाव, ता. ६ : खडकवाडी (ता. आंबेगाव) येथील खुडावस्ती येथे रविवारी (ता.५) भरदुपारी चोरट्यांनी बंद घराचे कुलूप तोडून घरातील कपाटाचे लॉक तोडून दोन तोळे वजनाचे सोन्याचे दागिने, रोख तीन हजार रुपये असा एकूण दोन लाख रुपयांचा ऐवज चोरून नेला आहे.
येथील खुडावस्ती येथे रभाजी भाऊ सुक्रे (वय ७७ ) व त्यांची पत्नी जनाबाई रभाजी सुक्रे ( वय ६५ वर्ष) हे ज्येष्ठ दांपत्य तसेच त्यांच्या मुलगा पोपट रभाजी सुक्रे हे तिघे जण राहतात रविवारी दुपारी हे तिघेही घराच्या शेजारी असलेल्या शेतातील कांद्याच्या बराकीतील कांदा भरण्यासाठी गेले होते. दुपारी दीड वाजण्याच्या सुमारास पोपट सुक्रे हे घरी येऊन पाणी घेऊन गेले त्यावेळी त्यांनी घराला कुलूप लावले होते. त्यानंतर पुन्हा साडेतीन वाजता घराकडे आले असता घराचे दार उघडे दिसले तसेच कुलूप तोडलेले होते. अज्ञात चोरट्यांनी घरातील कपाटाचे लॉक तोडून कपाटातील सोन्याचे मंगळसूत्र, दोन नथी, एक गळ्यातील पान असे दोन तोळे वजनाचे सोन्याचे दागिने व रोख तीन हजार रुपये चोरून नेले आहे. रभाजी सुक्रे यांनी माजी सरपंच अनिल डोके, माजी उपसरपंच एकनाथ सुक्रे व बाळासाहेब सुक्रे यांना भ्रमणध्वनीवरून चोरी झाल्याचे सांगितले. अनिल डोके यांनी पारगाव कारखाना पोलिसांना कळवल्यानंतर पोलिसांनी घटनास्थळी भेट देऊन माहिती घेतली आहे.