पारगाव, ता. ११ : कापडदरा (ता. आंबेगाव) येथे पोंदेवाडी फाटा ते मंचर रस्त्यालगत असलेल्या विद्युत खांबाला मोटार धडकून अपघात झाला. या अपघातामध्ये तिघेजण किरकोळ जखमी झाले असून, मोटारीचे मोठे नुकसान झाले आहे.
मंचर- शिरूर रस्त्यावर वैदवाडी फाटा ते पोंदेवाडीदरम्यान कापडदरा येथे बुधवारी (ता. १८) सकाळी सात वाजण्याचा सुमारास रस्त्यालगत असलेल्या विद्यूत खांबाचा अंदाज न आल्याने मोटार (क्र. एमएच १२ व्हीवो ६७५९) खांबाला धडकली. त्यामुळे ३३ केव्हीची विद्यूत तार तुटली व त्याठिकाणी मोठा जाळ झाल्याचे प्रत्यक्षदर्शींनी सांगितले. मोटारीमधील वाल्मीक गवळी व त्यांचा मुलगा वंश वाल्मीक गवळी व आणखी एक (नाव समजले नाही) हे तिघेजण किरकोळ जखमी झाले आहेत.
या रस्त्यालगत असणाऱ्या विद्यूत खांबामुळे याअगोदरही छोटेमोठे अपघात झाले आहेत. या ठिकाणी असणारा विद्यूत खांब वाहतुकीला मोठा अडथळा ठरत असल्याने हा विद्यूत खांब महावितरण कंपनीने एखाद्या मोठ्या अपघाताची वाट न पाहता त्वरित दुसऱ्या ठिकाणी हलवावा, अशी मागणी परिसरातील ग्रामस्थांनी केली आहे.

06628