पारगाव, ता.१० : हिंदू-मुस्लिम ऐक्याचे प्रतीक असलेल्या वडगावपीर (ता. आंबेगाव) येथील श्री पीरसाहेब यात्रा उत्सव बुधवार (ता. ११) ते शुक्रवार (ता. १३) या काळात आयोजित करण्यात आला आहे. संदल, बैलगाडा शर्यती, तमाशा आणि कुस्त्यांचा आखाडा हे या यात्रेचे मुख्य आकर्षण असणार आहे.
उत्सवाची सुरुवात बुधवारी सायंकाळी सहा वाजता संदल कार्यक्रमाने होणार आहे, अशी माहिती हजरत दावल मलिक दर्गा ट्रस्टचे हनिफ मुजावर यांनी दिली. गुरुवारी (ता. १२) सकाळी ७ ते सायंकाळी ७ या वेळेत बैलगाडा शर्यती रंगतील. रात्री ९ वाजता विठाबाई भाऊ नारायणगावकर यांचा लोकनाट्य तमाशा, तर शुक्रवारी (ता. १३) सायंकाळी ५ वाजता विठ्ठल मैदानावर कुस्त्यांचा जंगी आखाडा रंगणार आहे. या सर्व कार्यक्रमांचे नियोजन वडगावपीर-मांदळेवाडी ग्रामस्थ आणि शिवछत्रपती ग्रामविकास प्रतिष्ठानने केले आहे.