आपटाळे, ता. १४ : आयुष्यात यशस्वी होण्यासाठी विद्यार्थ्यांनी जिद्द व चिकाटी बाळगावी. प्रतिकूल परिस्थिती असल्यास त्याबाबत विद्यार्थ्यांनी न्यूनगंड न बाळगता यशस्वी होण्यासाठी प्रामाणिकपणे प्रयत्न करणे गरजेचे असल्याचे प्रतिपादन अमेरिकास्थित उद्योजक सचिन दरेकर यांनी केले. जुन्नर येथे श्री शिवाजी मराठा शिक्षण संस्था शिवनेर संचलित अण्णासाहेब आवटे विद्यामंदिर करिअर गायडन्स या विषयावर विद्यार्थ्यांना मार्गदर्शन करताना दरेकर बोलत होते.
यावेळी दरेकर यांनी अमेरिकेतील शिक्षणपद्धती, जीवनपद्धती, संवाद कौशल्य, उच्च शिक्षणाच्या संधी तसेच नोकरी व व्यवसाय यासाठी आवश्यक लागणारी मूलभूत कौशल्य या विषयावर सविस्तर माहिती दिली. तसेच दरेकर परिवाराच्या वतीने संस्थेस दहा हजार रुपयांची देणगी देण्यात आली.
याप्रसंगी मुख्याध्यापिका संगीता बारवे, त्रिमूर्ती पतसंस्थेचे संस्थापक विजय दरेकर, पर्यवेक्षक अनिल शिंदे, संदीप दातीर, सुनीता निलख, प्रियांका वर्पे, विष्णू खेडकर आदी उपस्थित होते. मीननाथ पानसरे यांनी सूत्रसंचालन केले.
APT25B02634