जुन्नर, ता. १९ : जुन्नर नगरपरिषदेच्या पंचवार्षिक निवडणुकीच्या रविवारी (ता. २१) होणाऱ्या मतमोजणीची प्रशासनाची तयारी पूर्ण झाली आहे. तालुका पंचायत समितीच्या राजमाता जिजाऊ सभागृहात मतमोजणीला सकाळी दहा वाजता सुरुवात केली जाणार आहे. निवडणूक दहा प्रभागांमध्ये झाली असल्याने मतमोजणीसाठी दहा टेबल लावले आहेत. या प्रत्येक टेबलवर तीन कर्मचाऱ्यांची नियुक्ती केली आहे. या सर्व नियुक्त कर्मचाऱ्यांना मतमोजणीसंदर्भात तीन वेळा प्रशिक्षण देण्यात आले आहे. मतमोजणीसाठी उमेदवार, प्रत्येक उमेदवाराचा एक मतमोजणी प्रतिनिधी व नगराध्यक्षपदाच्या प्रत्येक उमेदवाराचे दहा प्रतिनिधींना मतमोजणीसाठी परवानगी दिली आहे. मतमोजणीची प्रक्रिया अंदाजे दुपारी साडेबारा वाजेपर्यंत पूर्ण होईल, असे निवडणूक निर्णय अधिकारी अमोल कदम यांनी सांगितले.
मतमोजणी शांततेच्या वातावरणात व्हावी व कोणताही अनुचित प्रकार घडू नये, यासाठी जुन्नर पोलिस ठाण्याकडून बंदोबस्ताची तयारी पूर्ण केली आहे. मतमोजणीच्या दिवशी उपविभागीय पोलिस अधिकारी, दोन पोलिस निरीक्षक, अकरा पोलिस उपनिरीक्षक, ११० पोलिस अंमलदार, ५५ होमगार्ड व राज्य राखीव पोलिस दलाची एक तुकडी, असा बंदोबस्त तैनात केला आहे. निकालानंतर विजयी झालेल्या उमेदवारांनी डीजे वाजवून मिरवणुका काढू नये. डीजे व साउंडचा वापर झाल्यास तत्काळ जप्त करण्यात येणार आहे. विजयी उमेदवारांनी विजयाचा जल्लोष करताना कुणाच्याही धार्मिक भावना दुखावणार नाही याची काळजी घ्यावी. मोटार सायकलचे सायलेंसर काढून फिरवल्यास कठोर कारवाई करण्यात येणार आहे, अशी माहिती उपविभागीय पोलिस अधिकारी धनंजय पाटील व पोलिस निरीक्षक किरण अवचर यांनी दिली.