भुकूम, ता. १६ : मुळशी तालुक्यातील मुठा खोऱ्यात सोमवारी (ता.१५) एक तास गारांसह जोरदार अवकाळी पाऊस पडला. यामुळे शेतकऱ्यांची तारांबळ उडाली. सांयकाळी पाच वाजता गारांसह जोरदार पाऊस सुरू झाला. खारवडे येथे रस्त्याच्या कडेने पाणी वाहू लागले होते.
शेतकऱ्यांची सध्या खाचरांची ओढणी, शेणखते टाकणे, बांध दुरुस्तीची कामे शिवारात सुरू होती. अचानक आलेल्या पावसामुळे त्यांची तारांबळ उडाली. तसेच आंबा फळबागेवर गारांचा परिणाम होण्याची शक्यता आहे. खडकवाडी (कोळावडे), वांजळे, वातुंडे व आंदगाव येथे हरिनाम सप्ताह, प्रवचन, कीर्तनाचे कार्यक्रम होते. येथे जोरदार पावसामुळे वीज गायब झाली. यामुळे कार्यक्रम थांबविण्यात आले. खोरेतील जवळ, पिंपोळी परिसरात तुरळक पाऊस झाला.