भुकूम, ता. २२ : घोटावडे, (ता. मुळशी) कुळे व खेचरे येथील विद्यालयातील गोरगरीब विद्यार्थिंनीना सामाजिक कार्यकर्ते तात्यासाहेब देवकर यांनी १५ विद्यार्थिंनीना शिक्षणासाठी दत्तक घेतले. त्यांना वर्षभरासाठीचा सर्व खर्चाची रक्कम आमदार शंकर मांडेकर यांच्या हस्ते देण्यात आली. तसेच त्यांना शैक्षणिक साहित्याचे वाटप करण्यात आले.
यावेळी मांडेकर म्हणाले, ‘‘विद्यालयासाठी हॉल बांधून देण्यासाठी प्रयत्न करू. तसेच तालुक्यातील कंपन्यांना त्यांचा सीएसआर निधी शैक्षणिक विकासासाठी देण्याच्या सूचना देण्यात आल्या आहेत. तसेच विना अनुदानित शिक्षकांचे पगार देण्याबाबत सहकार्य करू. तसेच आतापर्यंत देवकर यांनी ८०० मुलींना शिक्षणासाठी आर्थिक सहकार्य केले. हे खरे सामाजिक कार्य आहे.’’
याप्रसंगी जिल्हा परिषदेचे माजी गटनेते शांताराम इंगवले, माजी उपसभापती रवींद्र कंधारे, संजय उभे, ज्ञानेश्वर साठे, राजाभाऊ शेळके, भीमाजी केसवड, संतोष गोडांबे, राम बोडके, नीलेश शेळके, योगेश गोडांबे, दीपक तापकीर, साईनाथ गोडांबे, अभिजित आमले, मुख्याध्यापक सुभाष देशमुख, ग्रामविकास अधिकारी चंद्रकांत देवकाबळे आदी उपस्थित होते. देवकर यांनी प्रास्ताविक; तर सुनील सातव यांनी सूत्रसंचालन केले.