भिगवण, ता. २९ : तक्रारवाडी (ता. इंदापूर) ग्रामपंचायतीच्या सरपंचापाठोपाठ उपसरपंचाविरुद्धचा अविश्वास ठरावही मंजूर झाला आहे. याबाबतची माहिती इंदापूरचे तहसीलदार जीवन बनसोडे यांनी दिली. तक्रारवाडी ग्रामपंचायतीच्या इतिसाहासांमध्ये प्रथमच सरपंच व उपसरपंच या दोघांविरुद्ध अविश्वास ठराव मंजूर झाला आहे.
सरपंच मनीषा वाघ यांच्याविरुद्ध जून महिन्यात हा ठराव मंजूर झाला. त्यानंतर शरद वाघ व इतर सहा ग्रामपंचायत सदस्यांनी उपसरपंच आशा जगताप यांच्याविरुद्धही अविश्वास ठराव दाखल केला होता. इंदापूरचे तहसीलदार जीवन बनसोडे यांच्या अध्यक्षतेखाली सोमवारी (ता. २८) तक्रारवाडी ग्रामपंचायत सदस्यांची बैठक झाली. यात सात सदस्यांनी ठरावाच्या बाजूने, तर एकाने विरोधात मतदान केले. प्रकृती अस्वास्थ्यामुळे उपसरपंच जगताप अनुपस्थित होत्या. त्यांच्याविरुद्धचा हा ठराव सातविरुद्ध एक मताने मंजूर झाल्याचे तहसीलदार बनसोडे यांनी जाहीर केले. सरपंच व उपसरपंच यांच्याविरुद्धचे अविश्वास ठराव मंजूर झाल्यामुळे पुढील सरपंच व उपसरपंच कोण होणार याबाबत उत्सुकता आहे.