भोर, ता. ११ : राजगड तालुक्यातील गुंजवणी धरण प्रकल्पाच्या लाभक्षेत्रात पुरंदर तालुक्यातील आठ गावांचा समावेश करावा. गुंजवणी पाणी प्रकल्पाची तालुक्यातील सुरुवात सोमुर्डी, गराडे व पठारवाडी गावापासून करावी, अशी मागणी ग्रामस्थांतर्फे भाजप जिल्हा उपाध्यक्ष व माजी जिल्हा परिषद सदस्य गंगाराम जगदाळे यांनी केली.

नीरा-देवघर प्रकल्पाचे कार्यकारी अभियंता स्वप्नील कोडुलकर यांना याबाबतचे निवेदन देण्यात आले. भोरमधील सांगवी-भाटघर येथील नीरा-देवघर प्रकल्पाच्या कार्यालयात
सोमवारी (ता.१०) जगदाळे यांनी निवेदन दिले. यावेळी बोपगावचे दयानंद फडतरे, भिवरीचे माजी सरपंच दिलीप कटके, थापेवारवडीचे सरपंच नीलेश जगदाळे, गराडेचे माजी उपसरपंच अमित दूरकर, गराडेचे तंटामुक्ती अध्यक्ष योगेश जगदाळे, सामाजिक कार्यकर्ते मोहन गायकवाड व मनोज घिसरे उपस्थित होते.
निवेदनात म्हटले आहे की, पुरंदर तालुक्यात येणाऱ्या गुंजवणीच्या पाण्याचे १९९३ च्या जुन्या सर्वेक्षणानुसार काम केले तर गराडे, थापेवाडी, सोमुर्डी, वारवडी, भिवरी-पठारवाडी, आस्करवाडी, बोपगांव,चांबळी व हिवरे या गावांचा शेतीच्या पाण्याचा प्रश्न कायमचा सुटणार आहे. या प्रकल्पाची सुरुवात सोमुर्डी येथून झाल्यास पुरंदरच्या सर्व भागांमध्ये पाणी पोहचवणे सोपे व सहज शक्य होईल. याशिवाय गराडे येथे पुरंदर तालुक्यातून वाहणाऱ्या कऱ्हा नदीचा उगम असल्यामुळे पुरंदर तालुक्याच्या सर्व भागामध्ये पाणी पोहचण्यास मदत होईल. तसेच आत्ताच्या नवीन सर्वेक्षणानुसार गुंजवणीच्या बंद जलवाहिनीच्या योजनेद्वारे पाणी आणल्यास जेवढे क्षेत्र ओलिताखाली आवश्यक आहे तेवढे पाणी मिळणार नाही. यासाठी सोमुर्डी येथूल प्रकल्पाचे पाणी देण्यास सुरुवात करावी, अशी मागणी केली आहे.