भोर, ता. १४ : भारती विद्यापीठ लॉ कॉलेज पुणे येथील विद्यार्थ्यांनी भोर शहरातील राजवाडा चौकात कौटुंबिक हिंसाचाराबाबत जनजागृती करण्यासाठी पथनाट्य सादर केले. मंगळवारी (ता. ११) सकाळी दहा वाजता राजवाडा चौकातील तहसील कार्यालयासमोर झालेल्या या पथनाट्यासमवेत प्रांताधिकारी डॉ. विकास खरात, तहसीलदार राजेंद्र नजन आणि अॅड. शिवाजी मरळ यांनी मार्गदर्शन केले. पुणे जिल्हा विधी सेवा प्राधिकरण, भोर तालुका विधी समिती, प्रांताधिकारी कार्यालय, तहसील कार्यालय, पंचायत समिती, दिवाणी व फौजदारी न्यायालय आणि भोर तालुका वकील संघटना भोर यांच्या वतीने या पथनाट्याचे आयोजन केले होते. रविवारी (ता. १६) सासवड (ता. पुरंदर) येथे होणाऱ्या शासकीय योजनांच्या महामेळाव्यात नागरिकांनी उपस्थित राहावे, असे आवाहन प्रांताधिकारी डॉ. विकास खरात यांनी केले.
यावेळी गटविकास अधिकारी तथा तालुका विधी सेवा समितीचे सचिव किरणकुमार धनवाडे, निवासी नायब तहसीलदार अरुण कदम, पुरवठा निरीक्षक प्रीतम गायकवाड, जिल्हा विधी सेवा प्राधिकरणाच्या ॲड. तेजल आहेर, ॲड. साक्षी कोंडे, भारती विद्यापीठ लॉ कॉलेजचे प्रा. सलील शृंगापुरे व शुभम त्रिपाठी आदी उपस्थित होते.
याशिवाय मंगळवारी सकाळी येथील न्यायालयात महिला दिन साजरा केला. न्यायालयाच्या प्रमुख दिवाणी न्यायाधीश नेहा नागरगोजे यांच्या हस्ते उपस्थित महिलांचा सन्मान केला. यावेळी वकील संघटनेचे अध्यक्ष ॲड. संतोष बाठे, उपाध्यक्ष ॲड. शिवाजी पांगारे, दिवाणी न्यायालयाचे सहाय्यक अधीक्षक सुमेध गुजर, ॲड. विठ्ठल दुधाणे, ॲड. दीपक बोरकर, ॲड. मनीषा तारू आदी उपस्थित होते.