भोर, ता. ९ : भोलावडे (ता. भोर) ग्रामपंचायतीच्या वतीने भैरवनाथ जोगेश्‍वरी माता यात्रेनिमित्त घेण्यात आलेल्या बैलगाडा शर्यतीत ३१५ बैलगाडे धावले. गोरख मांगडे (कात्रज पुणे) यांच्या बैलगाड्याने प्रथम क्रमांक पटकावून १ लाख रुपयांचे बक्षीस आणि सरपंच केसरी २०२५ ही मानाची ढाल पटकाविली. छत्रपती संभाजीनगर येथील समर्थ वाघ यांच्या बैलगाड्याला दुसऱ्या क्रमांकाचा ७१ हजार रुपयांचा तर यवत येथील क्लास ग्रुपच्या बैलगाड्याला तृतीय क्रमांकाचे ५१ हजारांचे बक्षीस मिळाले. या शिवाय संदीप मोडक (वडकी पुणे) यांच्या बैलगाड्याला चतुर्थ क्रमांकाचे ४१ हजारांचे, नितीन माने (शहापूर) यांच्या बैलगाड्यास पाचव्या क्रमांकाचे ३१ हजारांचे तर जीवन देडगे (नांदेड सिटी) यांच्या बैलगाड्याला सहाव्या क्रमांकाचे २१ हजारांचे बक्षीस मिळाले.
भोरमधील एसटी डेपोजवळील मैदानावर बुधवारी (ता. ७) झालेल्या बैलगाडा शर्यतीचे उद्‍घाटन सरपंच प्रवीण जगदाळे यांच्या हस्ते झाले. शर्यतीसाठी यशवंत डाळ, शशिकांत जगदाळे, सचिन बांदल, संतोष कुंभार, राहुल कुंभार, बाळासाहेब पवार यांनी सहकार्य केले. जिल्हा परिषदेचे माजी उपाध्यक्ष रणजित शिवतरे, माजी नगरसेवक यशवंत डाळ, राष्ट्रवादीचे तालुकाध्यक्ष संतोष घोरपडे, सरपंच प्रवीण जगदाळे यांच्या हस्ते स्पर्धेचे बक्षीस वितरण करण्यात आले.