भोर, ता. २५ : येथील राजगड ज्ञानपीठाच्या अनंतराव थोपटे महाविद्यालयातील महाराष्ट्र नेवल युनिट तीनच्या एनसीसी विभागातील दोन विद्यार्थ्यांची भारतीय नौदलात निवड झाली आहे. यामध्ये तृतीय वर्ष विज्ञान शाखेतील कॅडेट कॅप्टन अविष्कार मादगुडे आणि कॅडेट सुयश चव्हाण यांचा समावेश आहे.
आविष्कार याची नौदलाच्या एसएसआर टेक्निकल, एसएसआर मेडिकल व एसएसआर चीफ ब्रांचसाठी तर सुयश याची एसएसआर टेक्निकल ब्रांचसाठी निवड झाल्याची माहिती एनसीसी विभागाचे डॉ. संदीप उल्हाळकर यांनी दिली. महाविद्यालयातील एनसीसी विभागाचे विद्यार्थी पोलिस भरती, भारतीय लष्कर व इतर सुरक्षा दलांमध्ये सातत्याने यश संपादन करीत असतात. यावर्षीही हीच परंपरा विद्यार्थ्यांनी राखली असून दोन्ही कॅडेट्सनी आपल्या कर्तृत्वाचा ठसा उमटवला आहे. संस्थेचे अध्यक्ष माजी आमदार संग्राम थोपटे, मानद सचिव स्वरूपा थोपटे, उपाध्यक्ष पृथ्वीराज थोपटे यांनी अभिनंदन केले. प्राचार्य संजय नेवसे, उपप्राचार्य डॉ. सविता गायकवाड, लेफ्टनंट पल्लवी मळेकर यांनी विद्यार्थ्यांना शुभेच्छा दिल्या.