भोर, ता. १६ : दिवळे (ता. भोर) येथे डॉ. बाबासाहेब आंबेडकर जयंतीनिमित्त आयोजित आरोग्य शिबिरात २०० ग्रामस्थांची मोफत तपासणी करण्यात आली. इस्क्रा फाउंडेशन, अव्युक्त सोशल वेल्फेअर फाउंडेशन आणि सिद्धार्थ तरुण मंडळ यांनी संयुक्तपणे हा उपक्रम राबविला. या शिबिरात पिंपरी- चिंचवडचे वैद्यकीय अधिकारी डॉ. अजित कांबळे, डॉ. मायादेवी कांबळे, रेखा बाठे आणि अमृता गाडे यांच्या पथकाने रुग्णांची तपासणी करून मोफत औषध वाटप केले. यावेळी महिलांना पोषण, मासिक पाळी स्वच्छता, ओआरएस आणि पाणी शुद्धीकरणाबाबत मार्गदर्शन करण्यात आले. कार्यक्रमाच्या नियोजनासाठी दत्तात्रेय कुलकर्णी, हरिश्चंद्र देसले, आकाश जगताप, पोलिस पाटील प्रसाद पांगारे, अर्पिता पिळणकर, प्रतीक जगताप, अक्षया जगताप व ओंकार कांबळे यांनी परिश्रम घेतले.