बारामती, ता. ७ : विवाहीत मुलीस आत्महत्येस प्रवृत्त केल्याप्रकरणी बारामती शहर पोलिसांनी जगदीश मुरलीधर राठोड (रा. देसाई इस्टेट, बारामती) यांच्याविरुध्द गुन्हा दाखल केला आहे. या प्रकरणी मृत्यूमुखी पडलेली मुलगी सोनाली जगदीश राठोड हिचे वडील रमेश हिरा चव्हाण (रा. भारंबतांडा, ता. कन्नड, जि. छत्रपती संभाजीनगर) यांनी शहर पोलिसात फिर्याद दिली आहे.
सोनाली हिचे जगदीश यांच्यासोबत २ एप्रिल २०१६ मध्ये लग्न झाले होते. काही काळ गेल्यानंतर सोनाली यांनी वडीलांना पती दारू पिऊन मारहाण करत पैशांची मागणी करत असल्याचे सांगितले होते, मात्र त्या वेळेस वडिलांनी मुलीस समजून सांगितले. जगदीश यांची बारामतीला बदली झाल्याने ते सोनाली यांच्यासह बारामतीत वास्तव्यास आले.
२३ नोव्हेंबर २०२४ ला सोनाली हरविल्याचे समजल्यानंतर रमेश चव्हाण बारामतीत आले होते, मात्र गुरुवारी (ता. ५) सोनालीचा मृतदेह सापडल्याचे पोलिसांनी त्यांना कळविले. त्यानंतर त्यांनी पोलिसात जात जगदीश राठोड याने आपल्या मुलीचा शारीरिक, मानसिक छळ करत तिला आत्महत्येस प्रवृत्त केल्याची फिर्याद दाखल केली.