बारामती, ता. १२ : शहरात चार दिवसांच्या अंतराने दोन सोनसाखळी हिसकण्याचे प्रकार घडले.
बारामती शहरात बुधवारी (ता. १२) सकाळी पावणेआठच्या सुमारास चालण्यासाठी बाहेर पडलेल्या विजया श्रीनिवास प्रभुणे (वय ५१, रा. अनुज अपार्टमेंट, हरिकृपानगर) यांच्या गळ्यातील सतरा ग्रॅम वजनाचे अंदाजे दीड लाखांचे सोन्याचे मिनी मंगळसूत्र दोन चोरट्यांनी हिसकावून नेले. खलाटे हॉस्पिटलसमोर हा प्रकार घडला. रविवारी (ता. ९) संध्याकाळी फिरण्यासाठी बाहेर पडलेल्या मंगला जयप्रकाश किर्वे (वय ७०, रा. टीसी कॉलेज रोड, बारामती) यांच्या गळ्यातील एक लाख तीस हजारांचे मंगळसूत्र दुचाकीवरून आलेल्या चोरट्यांनी हिसकावून नेले. या दोन्ही प्रकरणी शहर पोलिसांनी गुन्हा दाखल केला असून, सीसीटीव्ही फूटेजच्या मदतीने पोलिसांनी तपास सुरु केल्याची माहिती उपविभागीय पोलिस अधिकारी सुदर्शन राठोड व पोलिस निरिक्षक विलास नाळे यांनी दिली.
बारामतीत गेल्या वर्षभरात झालेल्या सोनसाखळी चोरीच्या घटनेपैकी एकही चोरी उघडकीस आली नसल्याने बारामतीकरांमध्ये अधिक चिंतेचे वातावरण आहे. महिलांनी घराबाहेर पडताना पुरेशी काळजी घेण्याची गरज निर्माण झाली आहे.