बारामती, ता. २८ : ‘‘सातव्या वेतन आयोगाचा पगार मिळतो आहे, आता आठवा वेतन आयोगही दिला जाईल, सर्व आवश्यक सुविधा दिल्या जातात, असे असतानाही बारामतीत सरकारी अधिकारी व कर्मचारी कामासाठी पैशांची मागणी करतात, हे सोकावले असून, हे प्रकार खपवून घेणार नाही, त्याचा बंदोबस्तच करतो,’’ असा इशारा उपमुख्यमंत्री अजित पवार यांनी दिला.
बारामतीतील एका कार्यक्रमात शुक्रवारी (ता. २८) अजित पवार यांनी हा इशारा दिला. ते म्हणाले, ‘‘एका कार्यकर्त्याने निवेदन देत सांगितले की, एक नोंद लावण्यासाठी पंधरा हजारांची मागणी केली गेली. काय सुरु आहे बारामतीत? पगार व सुविधा पुरत नाहीत का? संबंधिताला संध्याकाळी बोलावून घेतले आहे. उपविभागीय पोलिस अधिकारी सुदर्शन राठोड तुम्हीही संध्याकाळी या त्याच्याकडे चौकशी करू. कुणीही कुणाच्याही वशिल्याने बारामतीत आला असेल तरी मी हे खपवून घेणार नाही. यात लक्ष घालून त्यांना सरळ केल्याशिवाय आता गत्यंतर नाही.’’

‘कंत्राटदार पुढारी नकोत’
‘‘विकासकामे करताना बारामतीकरांनीही आपली नैतिक जबाबदारी लक्षात घेत व्यवस्थित राहायला हवे. कार्यकर्तेही काम निघाले की कंत्राट मागतात, या पुढील ज्यांना कंत्राटदार व्हायचे आहे त्यांनी पुढारी व्हायचे नाही व पुढाऱ्यांनी कामे करायची नाही,’’ असे अजित पवार यांनी स्पष्ट केले.