बारामती, ता. ५ : उपविभागीय अधिकारी कार्यालय बारामती आणि इंदापूर तहसीलदार कार्यालयात सोमवारी (ता. ९) ‘महसूल लोकअदालत’ आयोजित केली आहे. महसूल न्यायप्रक्रियेतील प्रलंबित दाव्यांना सामंजस्याने आणि तडजोडीतून न्याय मिळवून देण्यासाठी लोकअदालत होणार असल्याची माहिती उपविभागीय अधिकारी वैभव नावडकर यांनी दिली.
महसूल विभागात उपविभागीय अधिकारी, तहसीलदार यांच्याकडे दावे अनेकदा वर्षानुवर्षे प्रलंबित राहतात. न्याय मिळवण्यासाठी नागरिकांना मानसिक त्रास सहन करावा लागतो. लोकअदालतीत दोन्ही पक्षकारांचे एकमत झाल्यास तडजोडीतून दावे निकाली काढले जाणार आहेत. सदर महसूल लोक अदालत उपविभागीय अधिकारी कार्यालय बारामती व तहसील कार्यालय इंदापूर येथे सकाळी ११ पासून सायंकाळी ५ वाजेपर्यंत सुरु राहील. सर्व तडजोड होऊ शकेल अशा दाव्यातील पक्षकारांनी प्रकरण लोकअदालतीत मांडून मार्ग काढावा, असे आवाहन नावडकर यांनी केले आहे.