बारामती, ता. ७ : पुण्यश्लोक अहिल्यादेवी होळकर शासकीय वैद्यकीय महाविद्यालय व सर्वोपचार रुग्णालयाच्या अधिनस्त नवीन नर्सिंग महाविद्यालय व वसतिगृह इमारतीचे बांधकाम करण्यासाठी ५५ कोटी २९ लाख रुपयांच्या अंदाजपत्रकास प्रशासकीय मान्यता देण्यात आली आहे.
शासनाच्या वैद्यकीय शिक्षण व औषधी द्रव्ये विभागाच्या वतीने या संदर्भातील अध्यादेश नुकताच जारी केला आहे. या निमित्ताने शैक्षणिक हब असलेल्या बारामतीत या पुढील काळात शासकीय नर्सिंग महाविद्यालयाच्या माध्यमातून विद्यार्थ्यांना शासकीय दरात नर्सिंगचे प्रशिक्षण प्राप्त करता येणार आहे. उपमुख्यमंत्री अजित पवार यांनी याबाबत पुढाकार घेत मान्यता मिळवून देण्यापासून ते इमारत उभारणीसाठी निधी उपलब्ध करून देण्यासाठी पाठपुरावा केला. या निर्णयामुळे आता या इमारतीचे काम लवकरच सुरु होण्याचा मार्ग मोकळा झाला आहे.
येथील एमआयडीसीतील महिला रुग्णालयाजवळ असलेल्या जागेमध्ये नर्सिंग महाविद्यालयाची इमारत उभारली जाणार आहे. या निर्णयामुळे नर्सिंग महाविद्यालयाच्या माध्यमातून परिचारिका व परिचारिका होण्याची संधी युवक व युवतींना प्राप्त होणार आहे.

कोविडनंतर परिचारिकांचे महत्त्व अधिक अधोरेखित झाले होते. त्या पार्श्वभूमीवर इतर शिक्षणासोबत नर्सिंग महाविद्यालय शासकीय स्तरावर सुरु केले जावे, अशी मागणी होती. त्याचा विचार करून राज्य शासनाने बारामतीत शासकीय नर्सिंग महाविद्यालयाच्या उभारणीस मान्यता दिली. आता इमारत उभारणीसाठी निधी मिळणार असल्याने लवकरच नवीन सुसज्ज प्रशस्त जागेत हे महाविद्यालय सुरु होईल.

असे आहे स्वरूप
• बारावीनंतर चार वर्षांचा बी.एस्सी नर्सिंग अभ्यासक्रम
• केंद्रीय सीईटी परिक्षेद्वारे प्रवेश होणार
• दरवर्षी १०० या प्रमाणे चार वर्षात ४०० विद्यार्थी होणार
• १ ऑगस्ट २०२५ पासून पहिल्या तुकडीचे प्रशिक्षण सुरु होणार
• इमारत होईपर्यंत वैद्यकीय महाविद्यालयात कामकाज होणार
• पाच प्रयोगशाळा महिला रुग्णालयानजिकच्या इमारतीत होणार