बारामती, ता. १७ : ‘‘शहराच्या सर्वांगीण विकासासाठी आवश्यक ते सर्व केले जाईल. बारामतीसाठी अजूनही भरपूर विकास कामे करायची आहेत. त्यासाठी निधीची कमतरता भासणार नाही,’’ अशी ग्वाही उपमुख्यमंत्री अजित पवार यांनी दिली.
बारामती शहरातील तीन हत्ती चौकामध्ये नटराज नाट्य कला मंडळाच्या प्रवेशद्वारासमोर सामाजिक उत्तरदायित्व निधीतून उभारण्यात आलेल्या ३० मीटर उंचीच्या राष्ट्रध्वज स्तंभाचे लोकार्पण स्वातंत्र्य दिनाचे औचित्य साधून अजित पवार यांच्या हस्ते व खासदार सुनेत्रा पवार, नटराज नाट्य कला मंडळाचे अध्यक्ष किरण गुजर यांच्या उपस्थितीत झाले. त्याप्रसंगी आयोजित कार्यक्रमात ते बोलत होते.
‘‘बारामती शहर स्वच्छ, सुंदर व हरित राहायला हवे, यासाठी सर्व बारामतीकरांनी आम्ही करीत असलेल्या प्रयत्नांना साथ दिली पाहिजे. तुम्ही साथ दिली नाही तर कितीही काम केले तरी त्याचा फारसा उपयोग होणार नाही. छत्रपती संभाजीनगर व नागपूरमध्ये न्यायालयाने फलक बंदी केली आहे. बारामतीतदेखील अजित पवार यांच्या फलकापासूनच असे फलक काढण्यास प्रारंभ करा,’’ अशा सूचना अजित पवार यांनी मुख्याधिकारी पंकज भुसे यांना दिल्या. बारामतीत अधिकाऱ्यांनी निर्णय घेताना घाबरू नये. त्यांची कुठेही बदली होणार नाही, याची काळजी मी घेतो. अधिकाऱ्यांवर कोणाचाही दबाव येणार नाही, हेदेखील आपण बघू, असे त्यांनी सांगितले.
हा राष्ट्रध्वज स्तंभ उभारणीसाठी सहकार्य केलेल्या रवींद्र लाड यांचे अजित पवार यांनी कौतुक केले. किरण गुजर यांनी स्वागत केले. याप्रसंगी अतिरिक्त पोलिस अधीक्षक गणेश बिरादार, उपविभागीय अधिकारी वैभव नावडकर, मुख्याधिकारी पंकज भुसे, उपविभागीय पोलिस अधिकारी सुदर्शन राठोड उपस्थित होते.

‘नटराज’चे योगदान महत्त्वपूर्ण’
अजित पवार यांच्या मार्गदर्शनाखाली किरण गुजर यांच्या प्रयत्नातून हा राष्ट्रध्वज स्तंभ साकारला. अजित पवार यांनी या उभारणीसाठी प्रयत्न करणाऱ्या सर्वच घटकांचे अभिनंदन केले. नटराज नाट्य कला मंडळाने बारामतीच्या सांस्कृतिक क्षेत्रात दिलेले योगदान महत्त्वपूर्ण असून, किरण गुजर यांच्या नेतृत्वाखाली या संस्थेने बारामतीत अनेक क्षेत्रात विधायक उपक्रम राबविल्याचा गौरवपूर्ण उल्लेख अजित पवार यांनी केला.