बारामती, ता. १७ : ‘‘विधानसभा निवडणुकीत झालेल्या पराभवाच्या मुद्याला उपमुख्यमंत्री अजित पवार शिळ्या कढीला सातत्याने का ऊत आणत आहेत? त्यांचे वक्तव्य टॉर्चर करण्याचा प्रयत्न आहे,’’ असे सांगत विधान परिषदेचे सभापती राम शिंदे यांनी पुन्हा एकदा नाराजी व्यक्त केली.
बारामतीत दहीहंडीच्या कार्यक्रमानिमित्त रविवारी (ता. १७) आले असताना माध्यमांशी बोलताना त्यांनी ही नाराजी अधोरेखित करत याबाबत महायुतीच्या वरिष्ठ नेत्यांनी बोलायला हवे, असेही नमूद केले. वाळवा येथे झालेल्या कार्यक्रमात आमदार रोहित पवार यांनी आपल्या भाषणात अजित पवार यांना उद्देशून, ‘ते भावकीकडे लक्ष देत नाही,’ अशी मिस्कील टिपण्णी केली होती. त्याला उत्तर देताना अजित पवार म्हणाले होते, ‘मी लक्ष दिले म्हणून तू आमदार झाला आहेस.’ त्याबाबत माध्यमांनी विचारले असता राम शिंदे यांनी वरील प्रतिक्रिया दिली.
ते म्हणाले, ‘‘या पूर्वीही अजित पवार यांनी ही बाब जाहीररीत्या बोलून दाखविली होती. हे वक्तव्य करून अजित पवार मला सातत्याने टॉर्चर करत आहेत, सातत्याने मला नाउमेद करण्याचा प्रयत्न करत आहेत. ते महायुतीतील एका पक्षाचे सर्वोच्च नेते आहेत, त्यांना ही गोष्ट वारंवार का गिरवावी वाटते, हे तेच सांगू शकतील. त्यामुळे मुख्यमंत्री व इतर वरिष्ठ नेतेच याबाबत बोलतील. महायुतीच्या अंतर्गत वरिष्ठ नेत्यांनी याबाबत चर्चा करायला हवी.’’