बारामती, ता. १७ : येथील मुक्ती ग्रामीण बिगर शेती पतसंस्थेला दिलेला धनादेश न वटल्याप्रकरणी प्रशांत बाळासाहेब यादव (शिरवली, ता. बारामती) यास सहा महिने सश्रम कारावासाची शिक्षा ठोठावण्यात आली. प्रथम वर्ग न्यायदंडाधिकारी इम्रान अब्दुल रज्जाक मरच्छिया यांनी ही शिक्षा ठोठावली.
धनादेशाची रक्कम दंड म्हणून भरण्याचाही आदेश देण्यात आला आहे. यादव याने पतसंस्थेला धनादेश दिला होता. तो न वटल्याने संस्थेने खटला दाखल केला होता. संस्थेकडून कर्जापोटी घेतलेल्या ७५ हजारांच्या रकमेची परतफेड न करता धनादेश देखील न वटता परत आल्याने युक्तिवाद व पुरावे मान्य करत न्यायालयाने ही शिक्षा सुनावली. पतसंस्थेतर्फे अॅड. सुनील वसेकर, अॅड. संदीप चव्हाण, अॅड विकी पोरे आणि अॅड पंकज काटे देशमुख यांनी काम पाहिले.