बारामती, ता. १९ : नियमाचा भंग करणाऱ्या नागरिकांविरोधात बारामती नगरपरिषदेने कायदेशीर व दंडात्मक अशा दोन्ही कारवाया सुरू केल्या आहेत. मध्यंतरी मुख्याधिकारी पंकज भुसे यांनी विनापरवाना फ्लेक्स लावल्यास न्यायालयाच्या निर्णयाचा अवमान केल्याचा गुन्हा दाखल करण्याचा प्रसिद्धिपत्रकाद्वारे इशारा दिला होता. बारामतीत गुरुवारी (ता. १८) एका ॲकॅडमी चालकाने विनापरवाना फ्लेक्स लावल्यानंतर नगरपालिकेने तातडीने हालचाली करत संबंधिताविरुद्ध बारामती शहर पोलिस ठाण्यात गुन्हा दाखल केला.
दरम्यान, दुसरीकडे सकाळी व संध्याकाळी श्‍वान फिरायला घेऊन येणारे व श्‍वानांकडून रस्ते अस्वच्छ करण्याच्या प्रकरणात एक हजाराचा दंड, तर गुटखा खाऊन थुंकणाऱ्या युवकांवर दोन हजारांचा दंड नगरपालिकेने आकारला आहे. या पुढील काळातही अशीच दंडात्मक कारवाई सुरू राहणार असल्याचे मुख्याधिकारी भुसे यांनी स्पष्ट केले आहे.

फ्लेक्सबंदी, पण कमानींना परवानगी
बारामती नगरपरिषदेने एकीकडे फ्लेक्सला परवानगी नाकारली असली तरी दुसरीकडे कमानींना मात्र परवानगी दिली आहे. माळावरच्या देवीच्या मंदिराकडे जाणाऱ्या रस्त्यावर नवरात्रोत्सवानिमित्त कमानी उभारण्यास प्रारंभ झाला असून, सहा कमानींना परवानगी दिल्याचे नगरपरिषद सूत्रांनी सांगितले. फ्लेक्सबंदीनंतर लोक आता कमानी उभारू लागल्याचे दिसत आहे.