बारामती, ता. १९ : प्रधानमंत्री पथविक्रेता आत्मनिर्भर निधी (पीएम स्वनिधी) अंतर्गत पथविक्रेते लोककल्याण मेळाव्याचे बारामती नगरपरिषदेच्या वतीने आयोजन केले गेले. या मेळाव्यात पथविक्रेते यांना शासनामार्फत मिळणाऱ्या कर्जाबाबत माहिती देण्यात आली. या कार्यक्रमाला बारामती नगरपरिषद समिती सदस्य फैयाज शेख, शुभम अहिवळे, असिफ शेख व नगरपरिषद कर्मचारी उपस्थित होते. बारामती नगर परिषद पथविक्रेता समिती सदस्य गौरव अहिवळे म्हणाले की, नगरपरिषदेने पथविक्रेत्यांची नोंदणी करावी, त्यांना हक्काची जागा देऊन आत्मनिर्भर करावे. कर्ज दिल्यानंतर पथविक्रेत्यांवर कारवाई झाली तर पथविक्रेते कर्जबाजारी होतील. पथविक्रेता समिती सदस्य शुभम अहिवळे, फैयाज शेख यांनी याप्रसंगी पथविक्रेत्यांच्या न्याय हक्कासाठी लढत राहणार असल्याचे नमूद केले.