बारामती, ता. १४ : संभाजी ब्रिगेडचे महाराष्ट्राचे अध्यक्ष प्रवीण गायकवाड यांच्यावर हल्ला करणाऱ्‍यांच्या निषेधार्थ सभा घेतल्याचा राग मनात ठेवून संभाजी ब्रिगेडचे जिल्हाध्यक्ष प्रशांत राजेंद्र पवार (रा. हिंगणेवाडी, ता. इंदापूर) यांना जीवे मारण्याची धमकी दिल्याप्रकरणी बारामती शहर पोलिसात सहा जणांविरुद्ध गुन्हा दाखल केला आहे.
किरण साळुंखे, वैभव रवींद्र साळुंखे, शुभम रवींद्र साळुंखे (तिघे रा. भाग्यनगर भवानीनगर, ता. इंदापूर), अक्षय चव्हाण (रा. तांदूळवाडी), राहुल मदने (रा. प्रगतीनगर बारामती), कालिदास ढाणे (रा. भवानीनगर, ता. इंदापूर) यांच्याविरुद्ध गुन्हा दाखल केला आहे. बारामतीत सोमवारी ही घटना घडली.
बारामतीतील न्यायालयाचे कामकाज संपल्यानंतर एका चहा सेंटरवर चहा पिण्यासाठी गेले असताना वरील सहा जणांनी त्यांना जीवे मारण्याची धमकी दिली, अशी फिर्याद त्यांनी शहर पोलिसांत दिली आहे. त्यावरून पोलिसांनी गुन्हा दाखल केला आहे.