बारामती, ता. १९ : नगरपरिषद निवडणुकीसाठी प्रशासन सज्ज झाले असून शनिवारी (ता. २०) सकाळी साडेसात वाजल्यापासून मतदानास प्रारंभ होणार असून संध्याकाळी साडेपाच वाजेपर्यंत मतदान प्रक्रिया सुरू असेल.
बारामती नगरपरिषद हद्दीत विविध ११५ मतदान केंद्रावर प्रभागनिहाय मतदारांसाठी मतदानाची सुविधा निर्माण करून देण्यात आली असून दिव्यांग मतदारांसाठी व्हिलचेअरचीही व्यवस्था करण्यात आली आहे. शनिवारी मतदान साहित्य वाटप केले असून सर्व टीम केंद्रावर पोहोचल्याची माहिती निवडणूक निर्णय अधिकारी संगीता राजापूरकर व सहायक निवडणूक निर्णय अधिकारी पंकज भुसे यांनी दिली. कोठेही अनुचित प्रकार घडणार नाही यासाठी कडक पोलिस बंदोबस्त तैनात केलेला असून मतदान प्रक्रियेत अडथळा निर्माण करणाऱ्यांवर कठोर कायदेशीर कारवाई होणार आहे. पोलिस अधीक्षक संदीपसिंह गिल, अतिरिक्त पोलिस अधीक्षक गणेश बिरादार व उपविभागीय पोलिस अधिकारी सुदर्शन राठोड यांनी पोलिस बंदोबस्ताचा शुक्रवारी (ता. १९) आढावा घेतला. तर प्रचार शिगेला पोहोचला होता. शेवटच्या क्षणापर्यंत एकेका मतासाठी उमेदवार व त्यांचे समर्थक प्रयत्न करीत होते.

मतमोजणी उद्या
रविवारी (ता. २१) सकाळी दहा वाजता मतमोजणी सुरू होणार असून सुरवातीला पोस्टल मते मोजण्यात येणार आहेत. त्यानंतर २० टेबलवर ईव्हीएम यंत्रातील मते मोजली जातील. सहा फेऱ्यांमध्ये सर्व मतमोजणी प्रक्रिया पूर्ण होणार आहे. सुरवातीला एक ते चार प्रभागातील मते मोजली जातील, त्या नंतरच्या टप्यांत पुढील प्रभागातील या नुसार मतमोजणी होणार आहे. ज्या प्रभागातील मतमोजणी पूर्ण होईल, त्याचे निकाल लगेचच जाहीर केले जातील, असेही संगीता राजापूरकर व पंकज भुसे यांनी सांगितले.