बारामती, ता. १४ : धनादेश न वटल्याच्या प्रकरणात पुरावा व साक्षी तपासून येथील वरिष्ठ स्तर दिवाणी न्यायाधिश प्रितेश भंडारी यांनी श्रीराम सुरेश पागळे (रा. पागळे वस्ती, ता. इंदापूर) यांना दोषी ठरवत तीन महिन्यांची साधी कैद, तसेच धनादेशाच्या दुप्पट रकमेची नुकसानभरपाई देण्याचे आदेश दिले आहेत. या प्रकरणात श्रीराम सिटी फायनान्स लिमिटेड बारामती शाखेच्या वतीने फिर्याद दिली होती. कर्जफेडीसाठी दिलेला धनादेश न वटल्याने वर्ष २०१८मध्ये खटला दाखल झाला होता. न्यायालयात साक्षी, दस्तऐवज व व्यवहाराचे पुरावे तपासल्यानंतर आरोपीने कर्ज घेतल्याचे व धनादेश देऊनही रक्कम न भरल्याचे सिद्ध झाले. नुकसान भरपाई न भरल्यास अतिरिक्त शिक्षा भोगावी लागणार आहे, असेही न्यायालयाने स्पष्ट केले. या खटल्यात फिर्यादीतर्फे अ‍ॅड. सुनील वसेकर, अ‍ॅड. संदीप चव्हाण व अ‍ॅड. पंकज काटे देशमुख यांनी काम पाहिले.